Debati për kthimin e Ligjit të Speciales në Kuvend, reagon Arbërie Nagavci

Deputetja e Lëvizjes Vetëvendosje, Arbërie Nagavci, ka bërë një reagim publik pas thirrjeve të fundit që Presidentja e vendit ta kthejë për rishqyrtim në Kuvend ligjin që përfshin ndryshimet në Dhomat e Specializuara. Nëpërmjet një postimi në rrjetin social Facebook, Nagavci ka kujtuar se Lëvizja Vetëvendosje qysh në fazën e parë kishte ngritur alarmin lidhur me procedurat e përshpejtuara, përmbajtjen e aktit ligjor dhe shkeljet e mundshme kushtetuese që mund të sillte ai. Ajo ka rikujtuar se qëndrimi i subjektit të tyre politik ndaj Gjykatës Speciale ka qenë i palëkundur që nga viti 2015, duke kundërshtuar themelimin e saj që në hapat e parë. Megjithatë, Nagavci ka shtuar se ndryshimet e miratuara nuk kanë fuqi të shfuqizojnë aktgjykimet, nuk mund të zëvendësojnë fazën e apelit dhe as nuk garantojnë rikthimin e menjëhershëm të ish-krerëve të UÇK-së në Kosovë. Sipas saj, pavarësisht rezerveve të theksuara, vota pro është dhënë me shpresën e sinqertë se çdo nismë institucionale do t'i dilte në zot çlirimtarëve dhe do të prodhonte rezultate reale. Ajo ka vlerësuar se tashmë, me kërkesat për rishqyrtim, po dalin në pah saktësisht ato dilema që partia e saj i kishte ngritur para se ligji të kalonte në Kuvend. Në fund të reagimit të saj, Nagavci ka përsëritur thirrjen për një strategji të mirëfilltë shtetërore, një platformë të mirëstudiuar juridike për procesin e apelit, si dhe një diplomaci më aktive për të mbrojtur pastërtinë e luftës çlirimtare. Ajo ka nënvizuar se proceset që lidhen me drejtësinë për çlirimtarët kërkojnë seriozitet maksimal institucional dhe jo akte ligjore të miratuara me nxitim.