Mourinho thur lavde për gjyqtarin para sfidës në Champions: S’do t’i duhet VAR-i

Para duelit të radhës të Real Madridit në Ligën e Kampionëve kundër RB Leipzigut, trajneri Jose Mourinho ka dalë para mediave për të diskutuar ecurinë e ekipit, çështjen e referimit dhe ambiciet e klubit madrilen për këtë edicion evropian. Gjatë konferencës, strategu portugez sqaroi se primare për “Los Blancos” aktualisht nuk është ngritja e trofeut, por kalimi i grupit dhe shmangia e fazës së plejofit, e cila u përjetua gjatë edicionit të kaluar. “Për momentin, objektivi i Real Madridit nuk është ta fitojë Ligën e Kampionëve, por të kualifikohet. Nëse i arrijmë pikët e nevojshme, objektivi i radhës do të jetë shmangia e plejofit, të cilin e luajtëm sezonin e kaluar. Janë ndeshje që mund t’i shmangim”, u shpreh ai. Duke analizuar ecurinë e garës, ai parashikoi një luftë të fortë dhe një kuotë të lartë pikësh për të arritur kualifikimin tutje. “Kam përshtypjen se do të nevojiten shumë pikë dhe se do të jetë e vështirë. Pasi t’i sigurojmë 11 ose 12 pikët e nevojshme, do të duhet të synojmë kualifikimin në fazën e 1/8 së finales”, shtoi tekniku. Sa i përket kundërshtarit gjerman, Mourinho kërkoi kujdes maksimal, duke mos u bazuar te rezultati i tyre i fundit negativ në kampionatin gjermani kundër Bayern Munichut. “Leipzigu nuk është skuadra që pësoi një humbje të rëndë në Mynih, por ajo që i ka tri pikë dhe dëshiron të kualifikohet. Ne i kemi fituar tri ndeshje brenda një kohe të shkurtër dhe të fundit e fituam duke luajtur shumë mirë, me një paraqitje të kompletuar. Por duhet të vazhdojmë kështu”, deklaroi ai. Duke kaluar te tema e gjyqtarëve, portugezi u tregua tejet entuziast për arbitrin e caktuar për këtë takim, duke e cilësuar si një figurë me integritet dhe autoritet të lartë. “Nesër kemi një gjyqtar që nuk bën shaka. Ai ka cilësi dhe personalitet të jashtëzakonshëm. Kam përshtypjen se, duke qenë kaq i mirë, VAR-i nuk do të ketë rol të rëndësishëm në ndeshje. Jam shumë i kënaqur që kemi një gjyqtar të tillë për një ndeshje si kjo”, theksoi portugezi. Një tjetër pikë e nxehtë në konferencë ishte koncepti i lojtarëve të paprekshëm, ku Mourinho theksoi se në fushë vlen vetëm performanca, duke përmendur rastin e Vinicius Juniorit. “I paprekshëm është vetëm stema. Nuk më pëlqen koncepti i lojtarit të paprekshëm. Ajo që e bën një futbollist të tillë nuk është statusi, shiriti i kapitenit apo shuma që është paguar për ti. Janë paraqitjet e tij në fushë ato që e bëjnë të paprekshëm”, u shpreh trajneri. Ndonëse rezultatet po vijnë, ai pranoi se skuadra ka ende nevojë për zhvillim dhe përmirësim në çdo aspekt. “Jemi këtu prej katër muajsh dhe është e pamundur që skuadra të jetë tashmë në nivelin që dëshirojmë. Duhet të përmirësohemi vazhdimisht, si individualisht, ashtu edhe kolektivisht. Sa më shumë që i njoh lojtarët dhe sa më shumë që ata më njohin mua, aq më i madh bëhet mirëkuptimi ynë taktik”, tha ai. Në lidhje me Arda Gülerin dhe Federico Valverden, Mourinho vlerësoi shkathtësinë e tyre taktike për të mbuluar role të ndryshme brenda formacionit. “Janë lojtarë të ndryshëm, por të dy kanë aftësinë të luajnë në disa pozicione dhe të përshtaten me role të ndryshme. Gjithçka varet nga situata. Mundohem të bëj më të mirën për skuadrën. Ndonjëherë do të kem të drejtë, e ndonjëherë jo”, u shpreh ai. Në mbyllje, lidhur me mundësinë që Espí dhe Kylian Mbappe të aktivizohen së bashku që nga minuta e parë, trajneri la të kuptohet se një zgjedhje e tillë paraqet vështirësi taktike për ekuilibrin e skuadrës.