Ten Hag thyen heshtjen: Prapaskenat e errëta të Ronaldos te United dhe mungesa e angazhimit në stërvitje

Ish-trajneri i Manchester Unitedit, Erik ten Hag, ka hedhur dritë mbi periudhën e dytë të Cristiano Ronaldos në klub, duke e akuzuar hapur yllin portugez për mungesë angazhimi dhe përkushtimi gjatë seancave stërvitore. Sipas teknikut holandez, Ronaldo shpesh i shmangej ngarkesave të plota, duke mos arritur nivelin e kërkuar të rrahjeve të zemrës gjatë stërvitjes. Ai madje kishte përfunduar vetëm dy nga tri xhirot e vrapimit të caktuara pas humbjes turpëruese 4:0 kundër Brentfordit në gusht të vitit 2022. “E kam ballafaquar me këtë çështje. Shumë herë i kam thënë: ‘Ronnie, të gjithë duan të punojnë për të të vendosur në pozitën e duhur, por nëse nuk mund të futesh në zonë, nuk mund të shënosh’. Ai nuk ishte në gjendje ta bënte këtë”, ka deklaruar Ten Hag, duke shtuar se sulmuesi nuk vraponte as me top e as pa top, pasi nuk ishte përgatitur siç duhet. Trajneri theksoi se megjithëse çdo skuadër e madhe duhet të mbështesë lojtarin e saj më të mirë, edhe vetë ylli ka detyrim të kontribuojë për ekipin. Ai zbuloi gjithashtu se Ronaldo u thoshte shpesh bashkëlojtarëve të ruanin këmbët në stërvitje, një qasje që sipas tij pranohet vetëm kur je në formë të shkëlqyer fizike, por jo para se të arrish nivelin e duhur të përgatitjes. Ten Hag beson se ky shembull dhe ndikim i Ronaldos është reflektuar negativisht edhe te lojtarët e tjerë. “Lojtarët duhet të veprojnë, sepse kanë përgjegjësi të madhe. Për disa prej tyre, futbolli nuk ishte prioriteti kryesor. Edhe Manchester Unitedi, për disa, nuk ishte prioriteti kryesor”, u shpreh ai. Debati rreth ndikimit të lojtarëve te vendimmarrja e klubit u rikthye në vëmendje pas deklaratave të bujshme të Lisandro Martinezit pas ndeshjes me Atletico Madridin. Edhe pse argjentinasi u gjobit nga klubi për komentet e tij, ai u rikthye menjëherë në dispozicion të ekipit. Ten Hag preferoi të mos e komentonte rastin e mbrojtësit, por u ndal te ndikimi i grupit të lojtarëve të ardhur nga Real Madridi. “Mendoj se pikërisht kjo erdhi nga lidhja me Madridin: lojtarët kishin shumë pushtet dhe dëshironin të merrnin vetë vendimet. Sipas mendimit tim, kjo nuk përputhej me fazën në të cilën ndodhej Manchester Unitedi. Drejtuesit dëshironin futboll sulmues dhe dinamik, ndërsa këta lojtarë dëshironin të luanin në një mënyrë që u përshtatej atyre”, shtoi holandezi. Me këtë shprehje, Ten Hag iu referua Casemiros, Raphael Varanes dhe Cristiano Ronaldos, të cilët së bashku kishin fituar 14 trofe të Ligës së Kampionëve nën drejtimin e Zinedine Zidane dhe Carlo Ancelottit. Duke folur për Casemiron, i cili u bashkua me Unitedin si mesfushor organizator me aftësi drejtuese, trajneri përfundoi: “Më pas, natyrisht, dukej sikur ai e humbi motivimin. Nuk e di se çfarë i kishin thënë”.