Ndryshim në horizont: Kush pritet të ndajë drejtësinë në superpërballjen mes Barcelonës dhe Real Madridit?

Javier Alberola Rojas është shndërruar në pretendentin kryesor për të vendosur drejtësi në “El Clasico” e madhe mes Barcelonës dhe Real Madridit, e cila do të luhet të dielën e ardhshme, më 25 tetor, në “Spotify Camp Nou”. Komiteti teknik i gjyqtarëve në Spanjë tashmë ka analizuar alternativat për këtë duel prestigjioz, ndërsa zyrtarizimi i emrit të arbitrit do të bëhet publik të shtunën, vetëm 24 orë para fillimit të sfidës. Në faza të hershme, Alejandro Hernández Hernández u lajmërua si opsioni kryesor, duke qenë se kishte drejtuar dy edicionet e fundit të kësaj përballjeje në “Camp Nou”. Megjithatë, zhvillimet e fundit kanë zbehur mundësitë e tij, duke e katandisur në një pozicion dytësor dhe duke i hapur rrugë emërimit të Alberola Rojasit. Për arbitrin nga rajoni i Castilla-La Mancha, ky do të ishte debutimi absolut në karrierën e tij në një “El Clasico”. Përveç kësaj, një tjetër rrethanë në favor të tij është fakti se këtë fundjavë nuk pati angazhime në La Liga, ndërsa gjatë këtij sezoni ai nuk ka ndarë drejtësi në asnjë ndeshje ku protagonistë të kenë qenë katalanasit apo madrilenët. Deri më tani, Alberola Rojas ka arbitruar 13 ndeshje të Barcelonës, ku skuadra blaugrana ka regjistruar një bilanc prej 10 fitoresh, dy barazimesh dhe vetëm një humbjeje. Paraqitja e fundit e katalanasve nën kujdesin e tij daton në shkurt të këtij viti, në triumfin 3-0 ndaj Levantes. Në krahun tjetër, ai ka kryesuar fushën në 19 takime të Real Madridit. Statisikat e madrilenëve në këto ndeshje tregojnë 12 fitore, tri barazime dhe katër humbje. Sfida e fundit e Real Madridit nën drejtimin e tij ishte barazimi ndaj Gironës në prill, kurse paraqitja e tij e fundit si gjyqtar në transfertë për “Los Blancos” mbetet fitorja 2-0 kundër Valencias në “Mestalla”. Përpara këtij angazhimi vendor, Alberola Rojas do të bëjë debutimin e tij në Ligën e Kampionëve këtë të mërkurë, në takimin ndërmjet Sabahut nga Azerbajxhani dhe Borussia Dortmundit. Gjatë këtij angazhimi evropian, ai do të mbështetet nga asistentët Alfredo Rodríguez Moreno dhe Carlos Álvarez Fernández. Edhe pse vendimi përfundimtar nuk është bërë ende zyrtar nga institucionet përkatëse, arbitri spanjoll mbetet alternativa më e besueshme dhe favorite për të udhëhequr një nga sfidat më të ndjekura në futbollin botëror këtë sezon.