“Nuk të urrejmë, por s’të duam më”: Artisti Çun Lajçi shpërthen me një letër të hapur ndaj Edi Ramës

Aktori i njohur shqiptar, Çun Lajçi, ka përcjellë një reagim të ashpër dhe të gjatë drejtuar kryeministrit të Shqipërisë, Edi Rama, duke e vënë në shënjestër për qeverisjen e tij, mënyrën se si i trajton protestat dhe ftesën e fundit për dialog drejtuar studentëve. Përmes një postimi në rrjetet sociale, Lajçi e ka quajtur të dështuar nismën e kreut të qeverisë për bashkëbisedim, duke e ironizuar faktin se ai foli para karrigeve bosht në shkallët e Kryeministrisë, në vend që të përballej hapur me studentët dhe pedagogët. Duke vijuar kritikat ndaj ekzekutivit, aktori ka ngritur akuza të forta për lidhje të dyshimta me figura të inkriminuara dhe afera korruptive, duke theksuar se zhgënjimi dhe pakënaqësia e qytetarëve, rinisë dhe shtresave të tjera të shoqërisë ndaj kreut të qeverisë kanë arritur kulmin. “Nuk të urrejmë, kryeministër, por nuk të duam ma!”, shkruan Lajçi në mesazhin e tij, duke shtuar se Shqipëria posedon mjaft të rinj e të reja atdhedashës që mund ta drejtojnë vendin drejt së ardhmes dhe se kombi nuk varet nga figura e tij.