Ten Hag thyen heshtjen: Sulmuesi yll që kërkova me çdo kusht te Manchester United

Ish-trajneri i Manchester Unitedit, Erik ten Hag, ka bërë një rrëfim të bujshëm, duke pranuar se sulmuesi anglez Harry Kane ka qenë objektivi i tij kryesor për merkaton e verës së vitit 2023, një transferim për të cilin ai insistoi fuqimisht, por që nuk u realizua kurrë për shkak të vendimeve të klubit. Në një prononcim për mediat e huaja, strategu holandez shpjegoi se pas përfundimit të sezonit të tij debutues në krye të "Djajve të Kuq", nevoja për një qendërsulmues të kalibrit botëror ishte emergjente, ndaj kapiteni i kombëtares së Anglisë ishte opsioni i tij i padiskutueshëm. "Unë kërkoja vetëm një lojtar të vetëm dhe të gjithë e dinë se për kë bëhet fjalë", u shpreh Ten Hag. "Bëra gjithçka për këtë marrëveshje. Kisha informacione se kishte një vullnet pozitiv, ndonëse nuk pata asnjëherë një bisedë direkte me vetë futbollistin. Arsyet e dështimit mbeten ende të panjohura për mua", shtoi ai. Tekniku holandez tregoj se përfundimisht u vu në dijeni nga strukturat drejtuese se klubi kishte hequr dorë nga ndjekja e kësaj piste, duke mos pasur një qartësi të plotë mbi motivet e këtij vendimi strategjik nga ana e drejtuesve të Unitedit. Në të njëjtën periudhë, gjatë merkatos së verës 2023, Kane përfundoi aventurën e tij te Tottenhami për të nisur një kapitull të ri te gjiganti gjerman Bayern Munich, në një transferim që kapte shifrën e rreth 110 milionë eurove, ndërkohë që klubi nga Manchesteri zgjodhi të investojë te talenti danez Rasmus Hojlund. Kujtojmë se Erik ten Hag u shkarkua nga drejtimi i Manchester Unitedit në muajin tetor të vitit 2024, pas një ecurie rezultatesh që nuk përmbushën pritshmëritë e klubit dhe tifozëve.