Kontratat kolektive: Ibrahimi duartroket nisjen e gjykimit, por shigjeton ashpër Qeverinë për mungesë serioziteti

Drejtori ekzekutiv i Asociacionit të Komunave të Kosovës, Sazan Ibrahimi, ka përshëndetur çeljen e procesit gjyqësor lidhur me dëmet financiare që u janë shkaktuar komunave nga kontratat kolektive, duke shfaqur besimin se drejtësia do të vendosë në favor të pushtetit lokal. Ibrahimi theksoi se pas një pritjeje disavjeçare, më në fund ka nisur trajtimi institucional i kësaj teme, për të cilën Asociacioni ka ngritur zërin vazhdimisht se komunave i janë zbritur padrejtësisht mjete nga buxheti, për shkak se marrëveshjet në fjalë ishin kurorëzuar nga pushteti qendror. "Pas disa viteve pritje, sot filloi procesi i parë sa i përket trajtimit të dëmeve të shkaktuara prej kontratave kolektive ndaj komunave. Neve si Asociacion i Komunave gjithmonë kemi deklaruar se këto mjete financiare janë marrë në mënyrë të padrejtë, sepse kontratat kolektive janë nënshkruar nga niveli qendror. Neve jemi shumë të kënaqur që ky proces filloi dhe po besojmë se gjykatat tona do të marrin vendime meritore dhe po shpresojmë se ato vendime do të jenë pro komunave", u shpreh ai. Sipas kreut të Asociacionit, gjatë periudhës së fundit nga llogaritë komunale janë zhvatur qindra miliona euro, duke paralizuar kështu realizimin e projekteve të rëndësishme që do të ngrinin cilësinë e jetesës për qytetarët. "Ne jemi dëshmitarë të kohës që gjatë këtyre viteve të fundit komunave në mënyrë të padrejtë iu kanë marrë me qindra milionë euro nga buxhetet e tyre, dhe ato mjete financiare nuk kanë mundur të zbatohen në shumë projekte për investime kapitale, në mallra, shërbime, në subvencione dhe kategori të tjera, të cilat në mënyrë të drejtpërdrejtë do të ndikonin në përmirësimin e jetës së qytetarit. Po shpresojmë që gjykatat tona do ta marrin një vendim meritor, të cilat neve shpresojmë që do të jenë pro komunave", shtoi Ibrahimi. Në fjalën e tij, ai nuk ka kursyer kritikat e ashpra ndaj ekzekutivit, duke e akuzuar se e ka anashkaluar këtë problematikë madhore. Për më tepër, mosprania e zyrtarëve qendrorë në seancën e parë dëgjimore dëshmon, sipas tij, mungesën e plotë të ndjeshmërisë dhe përgjegjësisë ndaj komunave. "Neve gjatë këtyre viteve kemi deklaruar se niveli qendror nuk është duke e marrë këtë çështje seriozisht. Dëmi po i shkaktohet komunave, kurse niveli qendror është shumë komod në këtë relacion. Me iu marrë komunave me qindra milionë euro, efekti është tek qytetari i Republikës së Kosovës dhe po e vlerësojmë që niveli qendror, edhe në këtë rast, nuk u tregua serioz ndaj komunave me mos-pjesëmarrje në seancën e parë dëgjimore sa i përket problemit të kontratave kolektive", përfundoi ai.