Arsenal në bisedimet e fundit: Declan Rice drejt rinovimit të madh dhe pagës rekord

Klubi londinez i Arsenalit ndodhet në çastet vendimtare të bisedimeve për vazhdimin e kontratës me mesfushorin e njohur, Declan Rice, duke synuar ta sigurojë atë për një periudhë shumë të gjatë kohore. Lajmi është bërë i ditur nga gazetari i njohur i transferimeve, Fabrizio Romano, i cili konfirmon se bisedimet mes palëve po ecin me ritme të shpejta drejt një akordi afatgjatë. Diskutimet për kontratën e re të reprezentuesit anglez kishin nisur në muajin mars të vitit 2026 dhe tashmë kanë kaluar në fazën e tyre përfundimtare, pasi drejtuesit e klubit e shohin atë si shtyllë kryesore të projektit të trajnerit Mikel Arteta. “Arsenali po përparon shumë mirë në përpjekjet për ta mbajtur në klub për një kohë të gjatë një nga lojtarët kyç të skuadrës, Declan Rice. Marrëveshja mes Arsenalit dhe Rice për kontratën e re po i afrohet fazës përfundimtare”, ka deklaruar Romano. Kujtojmë se Rice iu bashkua “Topçinjve” në korrik të vitit 2023 pas transferimit nga West Ham United, duke firmosur një marrëveshje që skadon në vitin 2028, e cila përfshin gjithashtu opsionin e klubit për ta zgjasë atë edhe për një sezon shtesë, deri në vitin 2029. Megjithatë, drejtuesit e klubit kërkojnë që t'i japin siguri të plotë të ardhmes së mesfushorit përmes kushteve të reja. Sipas burimeve pranë klubit, paga e tij aktuale prej afërsisht 240 mijë funtesh në javë pritet të ngjitet deri në rreth 350 mijë funte në javë me arritjen e marrëveshjes së re. Përmes këtij rinovimi, Rice do të vazhdojë të mbajë një rol primar në strukturën e skuadrës, në një kohë kur Arsenali po tregohet tejet aktiv në ruajtjen e bërthamës së saj, pas marrëveshjeve të ngjashme që u arritën kohët e fundit edhe me yje të tjerë si Bukayo Saka dhe William Saliba. Për “Topçinjtë”, sigurimi i vazhdimësisë së Declan Rice përbën një lëvizje strategjike për të garantuar stabilitet afatgjatë dhe për të mbajtur gjallë ambiciet madhore për trofe si në futbollin anglez ashtu edhe në skenën evropiane.