Kurorëzimi historik në Formula 1? Antonelli ul me këmbë në tokë para garës në Austin

Këtë të diel, pista e Austin në Texas mund të jetë skena e kurorëzimit të kampionit të ri të Botërorit 2026 në Formula 1, ku piloti i Mercedes-it, Andrea Kimi Antonelli, ndodhet vetëm një hap larg një triumfi të jashtëzakonshëm në karrierën e tij. Për të siguruar titullin që këtë fundjavë, talentit italian i duhet patjetër fitorja në Çmimin e Madh, ndërkohë që shoku i tij i skuadrës, George Russell, nuk duhet të renditet më lart se vendi i nëntë, kurse Lewis Hamilton duhet të mbetet jashtë katërshes më të mirë. Duke qenë se bëhet fjalë për një kombinim rezultatesh mjaft kompleks, vetë piloti preferon të ruajë qetësinë dhe të përqendrohet te performanca në pistë, duke shmangur çdo lloj parashikimi festiv para kohe. "Nuk kam fituar ende asgjë. Edhe pse duket se mungon vetëm pak, objektivi nuk është arritur ende. Jam në një pozicion të favorshëm për të fituar Botërorin dhe detyra ime është të jap maksimumin", – u shpreh Antonelli në një deklaratë dhënë për “Autosprint”. Pavarësisht kësaj qasjeje të matur, sezoni aktual ka folur qartë për dominimin e tij, të pasqyruar në shifra mbresëlënëse me 8 fitore dhe 14 pode në total. "Suksesi i parë në Shanghai më ka hequr një peshë të madhe nga shpatullat. Më i bukuri? Podi në Monza, për mënyrën si zhvillohet dhe atmosferën që krijohet, nuk ka të krahasur me asgjë në botë", – përfundoi italiani.