Kapiteni bjellorus pas humbjes në “Air Albania”: Atmosfera fantastike dhe vendim i gabuar për penalltinë

Futbollisti Zakhar Volkov ka mbajtur shiritin e kapitenit të Bjellorusisë në përballjen e zhvilluar në stadiumin “Air Albania” kundër Kombëtares së Shqipërisë, sfidë e cila u mbyll me humbje për ekipin e tij. Në prononcimin e dhënë pas përfundimit të takimit, Volkov u ndal te momenti kyç i ndeshjes: “Mund të thuhet se penalltia ndoshta kushtoi për rrjedhën e mëtejshme. Nuk dua të them se vendosi fatin përfundimtar, por u akordua ajo penallti dhe natyrisht që u mërzitëm. Megjithatë, ne e mbështetëm njëri-tjetrin dhe u bënim thirrje të gjithëve të mbeteshin të përqendruar, pavarësisht rezultatit dhe episodit të penalltisë. Më pas erdhi edhe goli i dytë, disi i pazakontë para përfundimit të pjesës së parë. Ky është futbolli. Në fraksionin e dytë u përpoqëm të rihapnim ndeshjen dhe ndërmorëm disa rreziqe”. Më tej, ai analizoi mangësitë e skuadrës së tij në fushën e lojës: “Na mungoi pasimi i fundit ose finalizimi i saktë drejt kuadratit. Topat përfundonin mbi portë. Ne provuam, por bëmë gabime; nganjëherë na mungonte shënjestra, herë të tjera topi thjesht rrëshqiste. Kemi shumë hapësirë për të punuar. Sigurisht që do ta analizojmë këtë ndeshje për të nxjerrë konkluzionet e duhura nga gabimet e bëra”. I pyetur rreth komunikimit me gjyqtarin gjatë lojës, kapiteni bjellorus u tregua i sinqertë: “Çfarë i thashë arbitrit? Asgjë të veçantë, pasi nuk e flas mirë anglishten. Thjesht po ankohesha sepse mendoja se duhej të akordonte disa faulla edhe në favorin tonë. Kryesisht, është më mirë të mos e them”. Sa i përket presionit të tribunave, Volkov e cilësoi atë si pozitive: “Presion nga tifozët? Përkundrazi, është kënaqësi të luash në një ambient të tillë. Edhe zhvillimi i ndeshjeve në transfertë është diçka e bukur, të cilën unë personalisht e shijoj. Puna e madhe bëhet pikërisht për përballje të tilla, për të luajtur në impiante të këtij niveli, kundër një kundërshtari të fortë dhe para një tifozërie kaq të zjarrtë. Është një emocion i veçantë, sidomos duke marrë parasysh se ne fatkeqësisht nuk mund të luajmë në shtëpinë tonë”. Në mbyllje të fjalës së tij, ai shtoi: “Besoj se edhe ne do të kishim pasur një mbështetje të madhe nga tifozët tanë nëse do të luanim në stadiumet tona, dhe në një skenar të tillë rezultati ndoshta mund të kishte qenë ndryshe, pasi gjithmonë është përparësi kur luan para publikut tuaj”.