Kryetarja e Speciales, Ekaterina Trendafilova: Askush nuk ka të drejtë të ndërhyjë në vendimet e gjykatësve

Kryetarja e Dhomave të Specializuara, Ekaterina Trendafilova, ka adresuar opinionin publik përmes një videomesazhi, ku ka vënë theksin te pavarësia e këtij institucioni gjyqësor, garantimi i sigurisë për dëshmitarët dhe viktimat, si dhe te përkushtimi i palëkundur ndaj parimeve të sundimit të ligjit. Reagimi i Trendafilovës vjen në një kohë kur Kuvendi i Kosovës ka ndryshuar Ligjin për Dhomat e Specializuara, zhvillim ky që pasoi shpalljen e vendimit dënues ndaj katër ish-krerëve të Ushtrisë Çlirimtare të Kosovës (UÇK) në Hagë, aktgjykim që u shoqërua me valë kritikash dhe protesta publike. Ajo ka theksuar se gjykata është vënë në shënjestër të dezinformatave të vazhdueshme që synojnë të minojnë pavarësinë dhe punën e saj, duke u kujtuar se trupi gjyqësor përbëhet nga profesionistë me integritet të lartë, të cilët vijnë nga vendet anëtare të Bashkimit Evropian dhe shtetet partnere kontribuuese. "Në kundërshtim me dezinformatat për gjykatën, të cilat vazhdojnë të përhapen, Dhomat e Specializuara garantojnë të drejtat për gjykim të drejtë të të akuzuarve, në përputhje me standardet e njohura ndërkombëtarisht," u shpreh ajo. Trendafilova shtoi se ligjshmëria e vendimeve gjyqësore kalon nëpër filtra të rregullt ankimi, duke përfshirë Panelin e Apelit të këtyre dhomave, si dhe Panelin e Gjykatës Supreme të Kosovës. "Të pandehurit gjithashtu mund t’i drejtohen Dhomës së Specializuar të Gjykatës Kushtetuese nëse besojnë se të drejtat e tyre janë shkelur. Vlen të theksohet se të pandehurit i kanë shfrytëzuar këto mjete juridike dhe, në një numër aktgjykimesh, kanë pasur sukses," sqaroi ajo. Megjithëse pranoi se kritikat ndaj vendimeve të gjykatës janë të pranueshme në një shoqëri demokratike, gjykatësja bullgare bëri të qartë se sundimi i ligjit nuk lejon askënd t'u diktojë gjykatësve mënyrën se si duhet të interpretojnë dhe zbatojnë normat ligjore. Në mesazhin e saj, ajo kujtoi gjithashtu se gjykata është përballur me përpjekje konkrete për të penguar drejtësinë, të cilat kanë rezultuar me dënime dhe pranime faji për vepra penale që lidhen me frikësimin e dëshmitarëve gjatë proceseve gjyqësore. Mandati i Dhomave të Specializuara, sipas saj, mbështetet mbi bazën e shkëmbimit të letrave, Kushtetutës së Kosovës dhe ligjit përkatës, ndërsa misioni kryesor mbetet zhvillimi i procedurave penale të sigurta, të paanshme dhe efikase, krahas mbrojtjes rigoroze të viktimave dhe dëshmitarëve. Në fund, kryetarja e Speciales përsëriti se gjykatësit e këtij institucioni përzgjidhen nga shtetet e BE-së dhe ato kontribuuese, duke plotësuar kriteret më të larta morale dhe profesionale, ndërsa detyrën e tyre e ushtrojnë në mënyrë të pavarur dhe në përputhje të plotë me konventat ndërkombëtare të përfshira në Kushtetutën e Kosovës, përfshirë Konventën Evropiane për të Drejtat e Njeriut.