Gjoba simbolike dhe pezullimi për Ronaldon, yllit portugez i duhen vetëm 36 sekonda për ta shlyer masën ndëshkimore

Federata Portugeze e Futbollit ka zyrtarizuar masat disiplinore ndaj Cristiano Ronaldos, duke e ndëshkuar me një muaj pezullim dhe një gjobë prej 255 eurosh, pasi sulmuesi u largua nga grumbullimi i fundit i kombëtares pa marrë lejen e duhur. Megjithatë, ky vendim ka ngjallur valë reagimesh dhe komente ironike në opinionin publik portugez, kryesisht për shkak të papërfillshmërisë së shumës së gjobës në krahasim me të ardhurat marramendëse të kapitenit. Duke iu referuar një përllogaritjeje statistikore, Ronaldos i duhen fiks 36 sekonda aktivitet në fushë për të siguruar të ardhurat e nevojshme për shlyerjen e këtij detyrimi financiar, duke llogaritur pagën e tij astronomike te skuadra e Al Nassr në Arabinë Saudite. Shifra prej 255 eurosh përbën vetëm 0,00012 për qind të arkëtimeve të tij vjetore, një detaj ky që e ka shndërruar ndëshkimin në kryefjalën e diskutimeve në mediat e vendit iberik. Përveç sanksionit monetar, 41-vjeçari është dënuar edhe me një muaj jashtë fushave me përfaqësuesen, por ky afat do të skadojë përpara se të nisë grumbullimi i radhës, çka do të thotë se ai do të jetë sërish nën urdhrat e përzgjedhësit Jorge Jesus. Në ambientin sportiv portugez, masa ndaj pesëherë fituesit të Topit të Artë është komentuar me nota humori, pasi për një sportist të këtij kalibri dhe me këto përfistime ekonomike, një gjobë e tillë duket thjesht simbolike. Kështu, një masë që synonte vendosjen e rregullit dhe disiplinës në gjirin e kombëtares, ka përfunduar duke u kthyer në një ngjarje komike për shkak të hendekut të madh mes ndëshkimit zyrtar dhe pasurisë reale të Cristiano Ronaldos.