Gjykata Speciale thyen heshtjen: Trendafilova hedh poshtë dezinformatat dhe garanton pavarësi totale të gjykatësve

Në një periudhë kur në Kosovë është miratuar Ligji për Specialen, kryetarja e Dhomave të Specializuara, Ekaterina Trendafilova, ka adresuar përmes një videomesazhi qëndrimin zyrtar të këtij institucioni ndaj zhvillimeve gjyqësore në Hagë dhe zërave kritikë për ndikime të jashtme. Gjatë këtij prononcimi, Trendafilova ka bërë të ditur se ky instancë gjyqësore është përballur vazhdimisht me raporte dhe informacione të pasakta sa i përket autonomisë dhe funksionimit të saj, duke ritheksuar se Dhomat e Specializuara përbëjnë një organ të pavarur dhe se trupi gjyqësor përbëhet nga profesionistë me integritet të lartë, të ardhur nga vendet anëtare të Bashkimit Evropian dhe shtetet kontribuuese. “Dhomat e Specializuara janë një institucion gjyqësor me mandat të përcaktuar përmes një shkëmbimi letrash, Kushtetutës së Kosovës dhe Ligjit për Dhomat e Specializuara dhe Zyrën e Prokurorit të Specializuar. Gjykata është e përqendruar në sigurimin e procedurave penale të sigurta, të pavarura, të paanshme, të drejta dhe efikase, duke siguruar njëkohësisht mbrojtje të fuqishme për dëshmitarët dhe viktimat. Në kundërshtim me dezinformatat për gjykatën, të cilat vazhdojnë të përhapen, Dhomat e Specializuara garantojnë të drejtat për gjykim të drejtë të të akuzuarve, në përputhje me standardet e njohura ndërkombëtarisht. Gjykatësit e emëruar në Dhomat e Specializuara janë nga shtetet anëtare të Bashkimit Evropian dhe shtetet kontribuuese. Për t’u kualifikuar si gjykatës në Dhomat e Specializuara të Kosovës, ata duhet të jenë persona me karakter të lartë moral, paanshmëri dhe integritet, të cilët zotërojnë kualifikimet e kërkuara në shtetet e tyre për emërim në postet më të larta gjyqësore,” ka deklaruar ajo. Kryetarja ka shtuar se anëtarët e trupit gjyqësor i kryejnë funksionet e tyre në mënyrë autonome, të paanshme dhe me ndërgjegje të plotë, duke i qëndruar besnikë idealeve të drejtësisë dhe zbatimit të ligjit. “Gjykatësit zbatojnë në mënyrë të vazhdueshme konventat ndërkombëtare të përmendura në Kushtetutën e Kosovës, përfshirë Konventën Evropiane për të Drejtat e Njeriut dhe praktikën e saj gjyqësore. Gjykatësit i zhvillojnë procedurat në një mënyrë që i mbron këto të drejta në çdo hap të procesit gjyqësor. Mbikëqyrja e vendimeve gjyqësore kryhet përmes procesit të ankesave, përfshirë panelet e Apelit të Dhomave të Specializuara të Kosovës dhe Panelin e Gjykatës Supreme. Të pandehurit gjithashtu mund t’i drejtohen Dhomës së Specializuar të Gjykatës Kushtetuese nëse besojnë se të drejtat e tyre janë shkelur. Vlen theksuar se të pandehurit i kanë shfrytëzuar këto mjete juridike dhe, në një numër aktgjykimesh, kanë pasur sukses,” theksoi ajo. Sa i përket kritikave publike ndaj vendimeve të deritanishme, ajo i ka cilësuar ato si normale për një shoqëri demokratike, ndërsa ka nënvizuar se fryma e sundimit të ligjit nuk lejon askënd që t'u diktojë gjykatësve mënyrën se si duhet ta interpretojnë dhe zbatojnë drejtësinë. “Si institucion gjyqësor i pavarur, Dhomat e Specializuara e ushtrojnë mandatin e tyre pa konsiderata, preferenca, ndikime apo ndërhyrje politike. Dhomat e Specializuara mbeten të palëkundura në përkushtimin e lor për të respektuar standardet më të larta ndërkombëtare, ndërsa vazhdojnë punën e besuar atyre në mënyrë të pavarur nga çdo presion i jashtëm, me pritshmërinë që të gjithë aktorët e përfshirë t’i përmbushin detyrimet e tyre përkatëse për të siguruar respektimin e sundimit të ligjit,” përfundoi kryetarja Trendafilova.