Përgatitje për çdo skenar: Finlanda ndan 100 milionë euro për blerjen e 1 milion minave përgjatë kufirit rus

Në kuadër të forcimit të sigurisë kombëtare, Finlanda ka nisur procedurat për blerjen e një milion minave kundër personit. Ky investim prej 100 milionë eurosh për municione vjen pasi Helsinki dhe shtetet e tjera të rajonit vendosën t'i japin fund angazhimit të tyre në një pakt ndërkombëtar të Kombeve të Bashkuara që ndalonte përdorimin e tyre. Ndërsa Moska akuzohet gjithnjë e më shumë për zhvillimin e një lufte hibride kundër shteteve që mbështesin Ukrainën dhe për mundësinë e provokimeve ushtarake, Finlanda u largua zyrtarisht nga Konventa e Otavës vitin e kaluar. Krahas saj, edhe Estonia, Letonia, Lituania dhe Polonia — të cilat radhiten ndër mbështetëset më të forta të Kievit — u tërhoqën nga e njëjta marrëveshje, duke u bazuar te rreziku që paraqet fqinji lindor. Koloneli Riku Mikkonen, përfaqësues i Komandës së Ushtrisë, bëri të ditur se autoritetet janë në fazën e grumbullimit të të dhënave nga ana e furnizuesve për këtë projekt. Plani i autoriteteve në Helsinki është që prodhuesit vendas të angazhohen në këtë proces, ku kontratat pritet të finalizohen deri në përfundim të vitit 2027, ndërsa nisja e prodhimit masiv parashikohet për vitin 2028. Finlanda ishte bërë palë në Konventën e Otavës në vitin 2012, një traktat me karakter humanitar që synonte zhdukjen përfundimtare të minave tokësore kundër personelit dhe asgjësimin e mbi një milion njësive të tilla. Megjithatë, duke iu referuar përkeqësimit të dukshëm të kushteve të sigurisë, ajo njoftoi tërheqjen në prill të vitit 2025 dhe prej muajit janar ka dalë përfundimisht nga ky detyrim ligjor ndërkombëtar. Duke qenë se ndan një vijë kufitare prej rreth 1,340 kilometrash me Rusinë, Finlanda ka intensifikuar ndjeshëm masat mbrojtëse që nga nisja e agresionit rus në Ukrainë më 2022, veçanërisht pas rasteve të raportuara të përdorimit të emigrantëve si mjete presioni nga lindja. Në një zhvillim tjetër, ministrja e Jashtme Elina Valtonen i bëri thirrje Bashkimit Evropian që të ndalojë menjëherë dhënien e vizave turistike për shtetasit rusë deri në përfundimin e konfliktit. Gjatë deklaratës së saj, ajo theksoi se prania e turistëve rusë në Evropë është e papranueshme në kohën kur vendi i lor sulmon qytetet ukrainase. Valtonen kujtoi se gjatë vitit 2025, vendet e zonës Shengen u dhanë afërsisht gjysmë milioni viza turistike qytetarëve rusë. Duke pasur parasysh se Finlanda i pat ndalur këto viza që prej vitit 2022, ajo përsëriti thirrjen që i gjithë blloku evropian të ndërmarrë të njëjtin hap vendimtar.