Skandali i “pagesave për ndikim”: Donald Trump urdhëron hetim ndaj ish-bashkëpunëtorit të afërt, Richard Grenell

Presidenti i Shteteve të Bashkuara të Amerikës, Donald Trump, ka ndërmarrë hapa për të nisur një hetim zyrtar ndaj një prej ish-aleatëve të tij më të ngushtë, Richard Grenell. Sipas informacioneve të publikuara, në zemër të Shtëpisë së Bardhë është ngritur alarmi për një skemë të mundshme të “pagesave për ndikim”. Në qendër të këtij rasti është një komunikim i pretenduar që daton nga muaji maj i vitit të kaluar, i ndërmarrë nga Grenell në drejtim të biznesmenit turk, Turhan Mildon. Në atë periudhë, Richard Grenell mbante pozitën e drejtuesit të qendrës kulturore “Kennedy Center”. Ai dyshohet se i ka kërkuar Mildonit që të transferojë një shumë prej rreth 17 milionë dollarësh drejt kompanisë “Texas Armament & Technology”, ku pjesa prej rreth 6 milionë dollarësh ishte parashikuar të shkonte si fond për qendrën e arteve. Në mesazhin e atribuar Grenellit thuhej se sapo fondet të mbërrinin te kompania në fjalë, do të organizohej donacioni për “Kennedy Center”, çka do t’i mundësonte biznesmenit pjesëmarrjen në ngjarje ekskluzive VIP dhe afrimitet me administratën, përfshirë vetë presidentin amerikan. Nga ana e tij, Richard Grenell i ka hedhur poshtë këto akuza, duke i cilësuar ato si plotësisht të pavërteta. Ndërkohë, bashkëshortja e Mildonit, avokatja Alina Habba, ka deklaruar se “Kennedy Center” nuk e ka pranuar kurrë këtë donacion. Sipas burimeve mediatike, Habba është takuar me presidentin Trump gjatë këtij muaji për të diskutuar çështjen e Grenellit, ngjarje kjo që thuhet se ka nxitur urdhrin e menjëhershëm të kreut të shtetit për nisjen e hetimeve nga ana e Shtëpisë së Bardhë. Theksojmë se Richard Grenell ka mbajtur më parë detyrën e emisarit special të presidentit Trump për dialogun ndërmjet Kosovës dhe Serbisë, gjatë periudhës 2019-2021.