Trazira të fuqishme në qendër të Milanos: 160 të arrestuar brenda pak orësh, shumica të mitur

Qendra e Milanos është përfshirë nga trazirat gjatë orëve të fundit, ku autoritetet policore kanë vënë në pranga të paktën 160 persona brenda një harku kohor prej vetëm katër orësh, si pasojë e incidenteve të dhunshme të regjistruara në zemër të qytetit. Të dhënat zyrtare tregojnë se rreth 80 për qind e të ndaluarve janë të moshës së mitur. Ndaj tyre pritet të nisë menjëherë procedimi penal, nën akuzat për shkaktim të dëmeve materiale dhe rezistencë të dhunshme ndaj forcave të rendit. Skena kaotike janë regjistruar veçanërisht në rrugën e njohur tregtare "Via Torino". Grupe të rinjsh kanë sulmuar ambientet e bizneseve lokale, duke përmbysur e hedhur tavolina e karrige në rrugë. Dyqanet e veshjeve dhe të këpucëve u përballën me sulme direkte ku turma goditi fasadat e tyre, ndërsa kazanët e mbeturinave u zhvendosën në mes të rrugës për të bllokuar kalimin. Disa nga të rinjtë arritën të hynin me forcë brenda ambienteve të dyqaneve, duke shkaktuar dëme të mëdha materiale. Si rrjedhojë e situatës së tensionuar, autoritetet kanë marrë vendim që stacioni i metrosë në "Piazza Duomo" të mbetet i mbyllur si masë parandaluese për sigurinë publike. Nga ana tjetër, efektivët e policisë që mbetën të lënduar gjatë përleshjeve kanë kërkuar reagim të rreptë. Ata kanë nëvizuar se duhet të bëhet çdo përpjekje e mundur për përballimin e kësaj gjendjeje të vështirë, me qëllim garantimin e rendit dhe sigurisë për banorët vendas dhe turistët e shumtë.