Mësimi vijon pas protestave: Kumbaro garanton zëvendësimin e çdo ore të humbur për nxënësit

Kreu i qeverisë shqiptare, Edi Rama, dhe Ministrja e Arsimit, Mirela Kumbaro, kanë zhvilluar një takim pune me drejtuesit e gjimnazeve të Tiranës, ku në fokus ishte ecuria e procesit arsimor dhe gjendja në shkolla pas zhvillimeve të protestave. Gjatë këtij bashkëbisedimi, ministrja Kumbaro bëri të ditur se në pjesën më të madhe të institucioneve arsimore procesi mësimor ka vijuar pa shkëputje, ndërsa siguroi se të gjitha orët e humbura si pasojë e mungesave të nxënësve do të plotësohen rregullisht. “Dje kemi pasur shkolla ku pjesëmarrja ka arritur deri në 90%. Shkollat kanë qenë të hapura për të gjithë. Procesi mësimor ka nisur edhe në rastet kur ka pasur mungesa fëmijësh. Janë orë të marra dhe të zhvilluara nga fëmijët, të cilat do të plotësohen të gjitha. Do t’u ofrojmë të gjithëve këshillim psikologjik, sepse kjo është një traumë,” u shpreh Kumbaro. Më tej, ministrja nënvizoi se trajnime të ngjashme janë realizuar edhe me oficerët e policisë të angazhuar në shkolla. Ajo garantoi se në të gjithë Shqipërinë procesi mësimor ka vazhduar normalisht, me përjashtim të pak episodeve të izoluara ku është tentuar të trazohen orët e mësimit nga jashtë dyerve të shkollave.