Trazirat në Francë: Qeveria vendos orë policore urgjente në disa qytete dhe në zona të Parisit

Autoritetet franceze kanë shpallur një shtetrrethim të pjesshëm në disa qytete të vendit, përfshirë pjesë të kryeqytetit Paris, pas pranimit zyrtar se forcat e rendit kishin “humbur kontrollin” gjatë protestave të dhunshme që tronditën mbarë vendin gjatë fundjavës. Kryeministri francez, Sébastien Lecornu, pas një mbledhjeje urgjente të kabinetit të hënën, shprehje “plotësisht i vendosur për të rivendosur rendin publik” dhe paralajmëroi mundësinë e aplikimit të kufizimeve të lëvizjes “lokale dhe të pjesshme” ku të jetë e nevojshme. Ai theksoi se “nuk kishte asnjë dyshim” për vendosjen e një shtetrrethimi të plotë në qytete të tëra, nëse situata do ta kërkonte. Më vonë, zyra e tij zyrtarizoi vendosjen e orës policore të pjesshme nga ora 20:00 deri në orën 06:00, për mbrëmjen e hënës dhe të martës, në katër qytete veriore, duke përfshirë edhe Lilen. Në mënyrë të ngjashme, policia vendosi kufizime lëvizjeje nga ora 23:00 e së hënës deri në orën 06:00 të së martës në dy zona kyçe të Parisit: te Place de la République, ku u regjistruan trazira të shtunën, si dhe në lagjen tregtare Les Halles, e cila u bë objekt i sulmeve dhe plaçkitjeve. Sipas një njoftimi zyrtar nga policia, këto urdhra ndalojnë rreptësisht çdo tubim dhe demonstratë, si dhe ndalojnë këdo që të hyjë apo të qëndrojë në dy zonat e caktuara gjatë orarit të ndalimqarkullimit. Nga ana e tij, qyteti i dytë më i madh i Francës, Marseja, kishte njoftuar më herët dhe në mënyrë të pavarur ndalimin e të gjitha tubimeve dhe demonstratave për ditën e hënë. Ndërkohë, sindikatat e fuqishme franceze kanë bërë thirrje për një valë të re grevash dhe protestash masive më 5 nëntor. Lecornu u deklarua para gazetarëve se shpallja e mundshme e gjendjes së jashtëzakonshme mbetet një opsion nëse konsiderohet i nevojshëm, ndërsa shtoi se për momentin masat e kufizuara duken “më të përshtatshme”. Këto zhvillime vijnë pasi ministri i Brendshëm pranoi dështimet operacionale gjatë protestave të së shtunës, ndërsa presidenti Emmanuel Macron kërkoi një riorganzim të plotë të sigurisë dhe aplikimin e “metodave të reja operative” për t'i dhënë fund dhunës. Laurent Nuñez pranoi të hënën se kishte pasur “mungesë parashikimi” në fazën përgatitore dhe se numri i efektivëve të policisë kishte rezultuar i pamjaftueshëm përballë valës së trazirave dhe grupeve të shkatërrimit në periferi të demonstratave. Sipas Nuñez, shërbimet e inteligjencës parashikonin rreth 200,000 demonstrues në shkallë kombëtare, por numri real i pjesëmarrësve i kaloi 500,000, duke shkaktuar rrëmbimin e natyrës paqësore të protestave dhe shndërrimin e tyre në një nga ditët më të dhunshme të viteve të fundit në Francë. Ministri informoi se i kishte ofruar dorëheqjen presidentit Macron për shkak të përgjegjësisë morale për ngjarjet, por kreu i shtetit e refuzoi atë, duke i kërkuar në këmbim që të ndërmarrë hapa vendimtarë për të siguruar transparencë rreth dështimeve në planifikim dhe inteligjencë. Këto protesta pasojnë disa javë pakënaqësish nga nxënësit e shkollave të mesme, të shoqëruara shpesh me përleshje të dhunshme me forcat e sigurisë, duke e futur vendin në një fazë të tensionuar gjashtë muaj para zgjedhjeve të vështira presidenciale dhe nën presionin e rëndë ekonomik. Autoritetet bënë të ditur se gjatë trazirave janë sulmuar dhe djegur ndërtesa publike, përfshirë një bashki, ndërsa rreth 2,000 dyqane janë plaçkitur dhe grabitur nga grupe keqbërësish. Në një përpjekje për të frenuar pasojat, ministrja franceze e Çështjeve Dixhitale, Anne Le Henanff, u kërkoi platformave të shitjes online të fshijnë menjëherë njoftimet për shitjen e “artikujve të vjedhur”, duke thirrur në një takim urgjent përfaqësues të kompanive si Vinted dhe eBay. Sipas Ministrisë së Tregtisë, në këtë takim u thirrën gjithashtu zyrtarë të Amazon, Leboncoin, Meta dhe TikTok. Sipas të dhënave zyrtare, Nuñez konfirmoi se 60,000 policë dhe forca të tjera të sigurisë janë angazhuar në terren për të vënë situatën nën kontroll.