Situata në shkolla pas protestave, Kumbaro: Mësimi vijon normalisht, çdo orë e humbur do të rikuperohet

Kryeministri Edi Rama dhe Ministrja e Arsimit, Mirela Kumbaro, kanë mbajtur një takim me drejtorët e shkollave të mesme të kryeqytetit, ku në fokus kanë qenë ecuria e mësimdhënies dhe gjendja aktuale në institucionet arsimore pas zhvillimit të protestave. Gjatë këtij bashkëbisedimi, Ministrja e Arsimit, Mirela Kumbaro, theksoi se në shumicën dërrmuese të gjimnazeve procesi edukativ ka vazhduar pa ndërprerje, duke garantuar njëkohësisht se të gjitha orët e lëndëve të humbura për shkak të mungesës së nxënësve do të zëvendësohen plotësisht. “Dje kemi pasur shkolla ku pjesëmarrja ka qenë 90%. Shkollat kanë qenë të hapura për të gjithë. Procesi mësimor ka nisur edhe kur ka pasur mungesa të fëmijëve. Janë orë të marra dhe të zhvilluara nga fëmijët, të cilat do të plotësohen të gjitha. Do t’u ofrojmë të gjithëve këshillim psikologjik, sepse kjo është një traumë. Të njëjtën punë me trajnime e kemi bërë edhe me oficerët e policisë në shkolla. Në të gjitha shkollat e Shqipërisë ka vijuar procesi mësimor, me shumë pak episode, kur jashtë dyerve të shkollave kanë tentuar të prishin orët mësimore”, u shpreh Kumbaro.