Austria kërkon maksimumin ndaj Kosovës, kapiteni i ri: Secili duhet të dëshmojë vlerat në fushë

Xaver Schlager do të ketë rolin e liderit në fushë, duke mbajtur shiritin e kapitenit të përfaqësueses së Austrisë në përballjen e së dielës kundër Kosovës, e cila vlen për Ligën e Kombeve. Mesfushori i njohur, i cili luan për Nottingham Forest, do të udhëheqë kombëtaren si kapiten për herë të parë në karrierën e tij, ndërkohë që kjo ndeshje përkon pikërisht një ditë para se ai të mbushë 29 vjeç. “Secili futbollist duhet të tregojë paraqitjen e tij më të mirë në fushë. Se ku aktivizohet secili prej nesh është çështje dytësore”, u shpreh Schlager gjatë konferencës për shtyp. “Padyshim që kam kaluar shumë eksperienca dhe mund t'u vij në ndihmë lojtarëve më të rinj. Mirëpo, në nivelin elitar ku luajmë, secili prej nesh ka detyrimin të marrë përgjegjësi dhe të shërbejë si shembull”, shtoi tutje futbollisti 28-vjeçar. Ai gjithashtu kujtoi kohën kur drejtohej nga trajneri i tanishëm i Kosovës, Foda, i cili e kishte udhëhequr Austrinë në Kampionatin Evropian të vitit 2021 – ngjarja e vetme e madhe ndërkombëtare ku Schlager ka marrë pjesë deri më tani me fanellën e kombëtares. “Ai është një trajner me parime të qarta organizative. Nuk preferon rreziqet e panevojshme, por kërkon që skuadra të ruajë kompaktësinë dhe disiplinën në fazën defensive”, vlerësoi Schlager ish-selektorin e tij. Mesfushori nuk ngurroi të bëjë edhe një analizë të punës që Foda ka bërë me përfaqësuesen e Kosovës. “Kam bindjen se ai ka bërë hapa para në zhvillimin e kësaj skuadre. Kosova mbetet një kundërshtar i fortë dhe ne do të duhet të japim maksimumin tonë për të arritur suksesin”, përfundoi deklaratën e tij Schlager. Ndeshja mes Austrisë dhe Kosovës, në kuadër të Ligës së Kombeve, do të zhvillohet sot (e diel), duke filluar nga ora 18:00.