Tragjedi në Harkiv: Një dron rus godet parkun e lojërave, humbin jetën gjashtë persona mes të cilëve edhe fëmijë

Gjashtë persona, përfshirë edhe fëmijë, kanë humbur jetën tragjikisht pasi një dron rus ka goditur një park në rajonin verilindor të Ukrainës, Harkiv, sipas njoftimeve të bëra publike nga autoritetet vendase ditën e martë. Presidenti ukrainas, Volodymyr Zelensky, e ka cilësuar këtë sulm si një “mizori” të papranueshme. Përmes një postimi në rrjetin social Facebook, ai theksoi se mjeti fluturues pa pilot ka goditur drejtpërdrejt civilët që ndodheshin në një park pranë një kafeneje. Kreu i shtetit ukrainas shtoi se mes viktimave ishte edhe një vogëlushe njëvjeçare, duke shpërndarë gjithashtu një fotografi të fëmijës në karrocë. Si pasojë e këtij sulmi në parkun qendror të Nova Vodollagës, krahas vogëlushes, ka ndërruar jetë edhe nëna e saj. Ky qytet, i vendosur në afërsi të vijës së frontit, numëronte rreth 10.000 banorë para se Federata Ruse të ndërmerrte pushtimin e plotë të Ukrainës në vitin 2022. Guvernatori i Harkivit, Oleg Synegubov, bëri të ditur përmes një njoftimi në Telegram se numri i viktimave përfshin tre fëmijë, ndërsa 15 persona të tjerë kanë marrë plagë, ku shtatë prej tyre janë të mitur. Në një reagim të mëparshëm, Synegubov e quajti ngjarjen një “akt tjetër terrorist nga Federata Ruse”. Ai u shpreh se armiku ka shënjestruar një zonë rekreative në orët e ditës, pavarësisht se aty mungon çdo lloj infrastrukture ushtarake. Edhe strukturat policore të Harkivit shpërndarë pamje fotografike në Telegram, ku shfaqeshin një karrocë e shkrumbuar, pajisje të shkatërruara të këndit të lojërave, si dhe një ndërtesë prej druri në prag të shembjes. Gjatë kësaj kohe, presidenti Zelensky ka ripërsëritur thirrjen drejtuar partnerëve ndërkombëtarë për t'i siguruar Kievit sisteme më të avancuara të mbrojtjes ajrore, sidomos në këtë periudhë tensionesh me presidentin amerikan, Donald Trump. “Kërkojmë që masat ndëshkimore ndaj Rusisë të qëndrojnë në fuqi për aq kohë sa dhuna dhe vrasjet vazhdojnë. Kërkojmë që Amerika të mbajë një qëndrim të fortë”, u shpreh Zelensky, i cili më herët kishte shprehur pakënaqësi ndaj vendimit të Uashingtonit për të lehtësuar disa sanksione kundër Moskës. Në krahun tjetër, autoritetet e vendosura nga Rusia në rajonin lindor të Luhanskut njoftuan se tre persona të tjerë u vranë të hënën, si pasojë e një sulmi ukrainas që preku një automjet funeral. “Një sulm nga ana e Ukrainës ka goditur një makinë të shërbimit të varrimeve që po transportonte një person të ndjerë, duke shkaktuar vdekjen e tre personave”, deklaroi përmes Telegramit Leonid Pasechnik, udhëheqësi rajonal i instaluar nga Moska.