Dhunë ndaj infermieres në Prishtinë gjatë detyrës, Oda e Infermierëve kërkon masa urgjente sigurie

Oda e Infermierëve, Mamive dhe Profesionistëve të tjerë Shëndetësorë (OIK) ka dalë me një reagim zyrtar pas incidentit të rëndë ku një infermiere u sulmua fizikisht në kryeqytet. Ngjarja ka ndodhur gjatë kohës që infermierja e Qendrës Kryesore të Mjekësisë Familjare në Prishtinë po ofronte shërbime mjekësore në shtëpinë e një pacienti, e vendosur në lagjen “Kalabria”. Institucioni përfaqësues i infermierëve e ka cilësuar ngjarjen si të patolerueshme, duke nënvizuar se agresioni ndaj mantelbajtësve, e sidomos atyre që shërbejnë në terren, përbën një akt të papranueshëm. “Profesionistët shëndetësorë duhet të jenë të mbrojtur dhe të sigurt gjatë ushtrimit të detyrës së tyre”, thuhet ndër të tjera në komunikatën e OIK-ut. Sipas këtij institucioni, akte të tilla cenojnë rëndë integritetin fizik të stafit mjekësor dhe rrezikojnë mbarëvajtjen e kujdesit shëndetësor për qytetarët. Në fund, Oda e Infermierëve u ka bërë thirrje institucioneve ligjzbatuese që ngjarja të trajtohet me prioritet dhe urgjencë, duke kërkuar ndëshkimin e personave të përfshirë sipas ligjeve në fuqi.