Ilir Kulla: Protestat nuk e dëmtojnë rrugëtimin europian të Shqipërisë, ja cilët janë faktorët realë që e rrezikojnë vendin

I ftuar në emisionin “Matrix”, nën moderimin e Mehmet Kalisit, drejtori i Global Crisis Group, Ilir Kulla, ka trajtuar çështjen e protestave të studentëve në Shqipëri dhe ndikimin e tyre të mundshëm në procesin e integrimit evropian, si dhe në pritjen e ngjarjeve të rëndësishme ndërkombëtare. Gjatë analizës së tij mbi shqetësimet se revoltat qytetare mund të cenojnë rrugën drejt Bashkimit Europian apo organizimin e aktiviteteve madhore, siç është samiti i NATO-s, Kulla vlerësoi se sfidat reale me të cilat përballet shteti shqiptar lidhen ngushtë me korrupsionin, trafikun e lëndëve narkotike, varfërinë dhe tensionet sociale. “Procesin e integrimit e rrezikon korrupsioni, trafiku ndërkombëtar i drogës dhe çdo poshtërsi tjetër që bëhet çdo ditë. E rrezikon varfëria, e rrezikon dhuna dhe konflikti social brenda vendit. Sigurisht që edhe ngjarjet që po ndodhin, të cilat kanë jehonë publike, mund të ndikojnë, por origjina nuk është aty. Origjina është diku tjetër dhe përgjegjës jemi të gjithë nga pak”, u shpreh Kulla. Më tej, ai ndalur te sektori i turizmit, duke argumentuar se pavarësisht rritjes së interesit dhe zhvillimit të dukshëm të vendit, frytet ekonomike nuk po shijohen nga shtresat e gjera të shoqërisë. “Ju vetë e keni parë se sa e lartë është kostoja e jetesës në Tiranë. Kryeministri të mos na tregojë vetëm numrin e turistëve dhe se Shqipëria është një destinacion i bukur, sepse kjo është e vërtetë. Kemi zhvillim dhe ai është i dukshëm, por ky zhvillim nuk është i prekshëm për 90 për qind të popullsisë”, deklaroi ai. Lidhur me organizimin e samitit të NATO-s dhe eventeve të tjera me përmasa globale, analisti theksoi se këto ngjarje nuk duhet të shërbejnë si mbulesë apo alibi për të fshehur sfidat e brendshme socio-ekonomike. “Ne do ta bëjmë samitin e NATO-s, ashtu siç kanë bërë edhe vende të tjera me ngjarje ndërkombëtare. Por, nëse kjo ndodh dhe ne nuk reflektojmë, atëherë duhet të kujtojmë edhe shembujt historikë”, tha Kulla. Për të ilustruar këtë qëndrim, ai solli në vëmendje Lojërat Olimpike Dimërore të vitit 1984 në Sarajevë, të zhvilluara vetëm pesë vjet para shpërbërjes së Jugosllavisë, duke dëshmuar se pritja e aktiviteteve të mëdha nuk përjashton ekzistencën e krizave të thella strukturore brenda një vendi. Në përmbyllje, sipas Kullës, autoritetet shqiptare duhet të tregojnë një angazhim të barabartë në adresimin e problemeve jetike ekonomike dhe sociale të qytetarëve, paralel me angazhimet në arenën ndërkombëtare.