Tragjedi në Torino: Zbulohen detajet rrëqethëse të vrasjes së 39-vjeçarit pas festës me drogë

Hetimet lidhur me vdekjen e tronditëse të 39-vjeçarit Fabio Colapietro, trupi i të cilit u zbulua i copëtuar brenda një banese në periferi të Torinos, kanë nxjerrë në dritë elemente të reja. Për këtë ngjarje të rëndë është vënë në pranga 26-vjeçari Christian Matheus De Oliveira Morando, i cili ka pranuar para autoriteteve se ka shkaktuar humbjen e jetës së viktimës, por ka hedhur poshtë akuzat se krimi ka qenë i parapërgatitur. Sipas dëshmisë së dhënë nga i riu gjatë seancës së pyetjeve, sherri me Colapietron dyshohet se nisi për një shumë modeste prej rreth 50 eurosh. Ngjarja tragjike erdhi pas disa ditësh festë intensive në atë apartament, ku sipas hetimeve është konsumuar në sasi të mëdha alkool dhe lëndë narkotike. Ekipi mbrojtës i 26-vjeçarit ka theksuar se klienti i tyre ndodhet në një gjendje të rëndë konfuzioni mendor, duke ngritur dyshime se ai mund të mos ketë vepruar i vetëm. Avokati ka renditur substancat e përdorura gjatë atyre ditëve, duke përfshirë crack, LSD, kanabis, kërpudha halucinogjene dhe MDPHP, të shoqëruara me sasi të konsiderueshme alkooli. Duke rrëfyer ngjarjen, i dyshuari ka treguar se pasi u zgjua të nesërmen, i kishin thënë se Colapietro mund t'i kishte marrë rreth 50 euro, çka solli shpërthimin e një konflikti fizik mes tyre. Mbrojtja pretendon se gjatë kësaj përleshjeje, 39-vjeçari u rrëzua dhe për pasojë ndërroi jetë. “E vrava, por pa dashje. Sigurisht që nuk ishte e planifikuar”, mësohet të jetë shprehur 26-vjeçari përpara trupit gjykues. I pyetur nga autoritetet nëse e kishte kapur viktimën nga fyti gjatë sherrit, i dyshuari është shprehur se nuk e mban mend këtë detaj. Nga ana tjetër, avokati i tij ka pretenduar se pas ngjarjes janë bërë përpjekje intensive për rreth dy orë për ta kthyer 39-vjeçarin në jetë, përmes masazhit kardiak dhe frymëmarrjes artificiale. Ndërkohë, grupi hetimor po punon intensivisht për të zbardhur rolin e personave të tjerë që ndodheshin në banesë. Në kuadër të hetimeve janë marrë në pyetje Nicole Formichetti, 47 vjeçe, e cila ishte qiramarrësja e apartamentit, si dhe 22-vjeçarja Keith Butig, të cilat dyshohen për veprime që kanë të bëjnë me fshehjen e trupit dhe favorizimin e autorit. Formichetti ka zgjedhur të heshtin gjatë seancës para gjyqtarit. Përfaqësuesi i saj ligjor argumentoi se ajo nuk ishte në kushtet e duhura për të dëshmuar dhe se marrja në pyetje e saj mund të shtyhet për një moment të dytë. Në krahun tjetër, Butig ka mohuar çdo lidhje me vrasjen e 39-vjeçarit. Sipas avokatit të saj, ajo kishte qenë e pranishme gjatë festës dhe kishte blerë disa qese të zeza, por nuk ka marrë pjesë në aktet e mëvonshme. Mbrojtja e saj pohon se 22-vjeçarja ka qenë në një gjendje të rënduar psikologjike dhe ishte vetëizoluar në një nga dhomat e shtëpisë. Organet e drejtësisë në Itali po vijojnë verifikimet për të rindërtuar me saktësi dinamikën e plotë të krimit dhe për të përcaktuar përgjegjësinë penale të secilit prej individëve të përfshirë. Së shpejti pritet edhe vendimi i gjykatës lidhur me masat e sigurisë për personat e ndaluar.