“Hajde, Jutta!”: Bashkëshortja e Michael Schumacher zbulon detaje intime dhe fansen e çuditshme të legjendës

Corinna Schumacher, gruaja e shtatë herë kampionit të botës në Formula 1, Michael Schumacher, ka ndarë kujtime të papublikuara më parë rreth legjendës së automobilizmit, përmes një dokumentari të ri në Netflix. Prej aksidentit tragjik në skicim gjatë vitit 2013, ku mori dëmtime të rënda cerebrale, Michael Schumacher është tërhequr plotësisht nga sytë e publikut. Që nga ajo kohë, rrethi i tij familjar ka ruajtur me vendosmëri maksimale privatësinë, duke e mbajtur gjendjen e tij shëndetësore larg vëmendjes së mediave. Sidoqoftë, në dokumentarin e freskët të Netflix, të titulluar “Schumacher ’94: Birth of a Legend”, i cili i kushtohet sezonit kur piloti gjermani rrëmbeu kurorën e tij të parë botërore, Corinna ka sjellë në vëmendje momente mjaft intime nga jeta e tyre në çift. Ajo ka evokuar posaçërisht hitin “Rush Rush” të këngëtares Paula Abdul, një melodi që mbante një domethënie të thellë emocionale për dyshen. “Kjo ishte kënga jonë. Kur e dëgjoj sot në makinë, qaj vetëm me vete”, ka rrëfyer Corinna. Gjatë rrëfimit, ajo është ndalur edhe tek sasia e madhe e korrespondencës që Michael merrte nga mbështetësit, duke veçuar rastin e një admirueseje të zjarrtë. “Merrte jashtëzakonisht shumë letra. Një vajzë i shkruante dhe bashkë me letrat i dërgonte gjithmonë edhe të brendshme. Quhej Jutta. Në një moment, ‘Hajde, Jutta’ u bë shprehja e tij e zakonshme”,ka treguar ajo. Edhe pse ky projekt kinematografik nuk jep të dhëna të reja lidhur me shëndetin aktual të Schumacherit, partnerja e tij e jetës i ka përcjellë një dedikim tejet prekës. “Zemra ime rreh për të kur fiton. Edhe kur humb. Zemra ime është gjithmonë me të. Është e mrekullueshme të jesh me dikë që mezi pret ta shohësh çdo ditë”,ka thënë Corinna. Në aspektin sportiv, Michael Schumacher garoi për skuadrën Benetton përgjatë vitit 1994, duke siguruar titullin e parë të karrierës pas një mbylljeje dramatike të kampionatit dhe përplasjes famëkeqe me Damon Hill në pistën e Adelaide. Suksesin e njëjtë ai e përsëriti edhe më 1995, po me Benetton, kurse një vit më vonë ndryshoi ambient duke kaluar te skuderia italiane Ferrari. Në vitin 1999, gjermani ishte sërish pretendent kryesor për titull, por gjatë Çmimit të Madh të Britanisë pësoi një dëmtim të rëndë duke thyer këmbën, ndonëse ia doli të kthehej në garë para se sezoni të ulte siparin. Trofeun e parë me Ferrarin e ngriti lart në vitin 2000, pas një rivaliteti të fortë me Mika Häkkinen të skuadrës McLaren. Kjo shënoi pikënisjen e një epoke të gjatë dominimi për Schumacherin dhe prodhuesin nga Maranello. Më pas, gjermani triumfojë edhe në katër kampionate radhazi, nga viti 2001 deri në 2004, duke e ngjitur në shtatë numrin e përgjithshëm të kurorave të fituara. Schumacher njoftoi tërheqjen e parë nga Formula 1 në përfundim të vitit 2006, por vendosi të rikthehej në vitin 2010 si pjesë e ekipit të Mercedesit. Ky rikthim nuk i solli lavdinë e viteve të arta te Ferrari. Për tri sezone radhazi, ai u ngjit në podium vetëm një herë, gjatë Çmimit të Madh të Evropës të zhvilluar në Valencia në vitin 2012. Në fund të atij sezoni, kampioni legjendar i dha lamtumirën përfundimtare sportit të automjeteve.