Aksion i gjerë në veri, Adem Salihaj: Kjo pjesë e vendit nuk është më tokë e askujt

Nëntë persona janë vënë në pranga në Zubin Potok, pasi dyshohen se kanë përgjegjësi penale për veprën “Krime lufte kundër popullsisë civile”. Sipas njoftimit zyrtar nga Prokuroria Speciale, ky aksion u ndërmarr në kuadër të operacionit të koduar “Dosja 23”. Ndërhyrja u realizua nga Policia e Kosovës, konkretisht nga Drejtoria për Hetimin e Krimeve të Luftës, e cila u mbështet edhe nga ekipe të tjera të specializuara. Ky operacion u zhvillua me urdhër të drejtpërdrejtë të Prokurorisë Speciale dhe lidhet ngushtësisht me dosjen e njohur në opinion si “Grupi i intelektualëve”. Zhvillimet e fundit në veri kanë sjellë edhe reagimin e ish-deputetit të LDK-së, Adem Salihaj, i cili ka komentuar arrestimin e nëntë të dyshuarve për krime lufte. Salihaj i ka dhënë mbështetje të plotë aksionit policor, duke theksuar se kjo zonë e territorit tonë tashmë është plotësisht nën sovranitetin e institucioneve shtetërore. “Veriu më nuk është tokë e askujt, veriu është tokë e Kosovës. Mjaft është mjaft, nuk ka më amnesti dhe falje të kriminelëve, të cilët kanë kryer masakra ndaj popullatës së pambrojtur të Kosovës. Duhet përgëzuar Policinë e Kosovës, i lumtë për aksionet dhe punën e jashtëzakonshme që po bën në këtë pjesë të Kosovës”, është shprehur ndër të tjera ai.