Momente ankthi në Las Vegas: Sportisti humb ndjenjat në kafaz, gjesti madhështor i kundërshtarit

Një ngjarje dramatike ka ndodhur në Las Vegas, ku luftëtari Raoni Barcelos ka humbur vetëdijen brenda kafazit, duke u transportuar më pas me urgjencë për në spital. Përballja e fortë mes Raoni Barcelos dhe Raul Rosas Jr. kishte prodhuar një duel të ekuilibruar deri në raundin e pestë, kur situata mori një kthesë të rrezikshme. Në këtë raund, rreth 1 minutë e 38 sekonda para mbylljes së duelit, Rosas arriti ta rrëzonte Barcelosin në dysheme. Pasi u rrëzua, Barcelos mbeti i palëvizshëm dhe nuk dha më shenja reagimi. Duke kuptuar menjëherë rrezikun dhe se diçka nuk shkonte, Rosas refuzoi të vazhdonte sulmet dhe sinjalizoi menjëherë gjyqtarin. Gjyqtari ndërpreu garën pa vonesë, ndërkohë që stafi mjekësor zbriti brenda kafazit për t'i ofruar ndihmën e parë sportistit. Në vend që t'i gëzohej fitores, Raul Rosas Jr. u shfaq qartazi i shqetësuar dhe qëndroi pranë kundërshtarit. Më vonë, ai u bëri thirrje të gjithëve përmes një deklarate: “Dua që të gjithë të luten për Raoni Barcelosin. Ai është një luftëtar.” Barcelos u nxor nga arena me barelë dhe u dërgua drejt spitalit në Las Vegas për analiza të detajuara, ku iu nënshtrua një skanimi CT dhe kontrolleve të tjera shëndetësore. Sipas njoftimit zyrtar nga organizata UFC, gjendja e tij u konfirmua e qëndrueshme, ai ishte i vetëdijshëm, i përgjigjej stafit mjekësor dhe kishte lëvizshmëri të plotë, pavarësisht se u mbajt në spital për vëzhgim të mëtejshëm.