Garantohen kursimet e qytetarëve: Banka e Shqipërisë qetëson opinionin publik pas dëmtimeve në disa filiale bankare

Depozitat dhe kursimet e qytetarëve në sistemin bankar janë plotësisht të sigurta, pavarësisht dëmtimeve të regjistruara në disa prej degëve të bankave që ushtrojnë aktivitetin e tyre në kryeqytet. Përmes një reagimi zyrtar, Banka e Shqipërisë ka bërë të ditur se ndërprerjet apo kufizimet e përkohshme të shërbimeve në disa filiale të caktuara janë ndërmarrë ekskluzivisht për të garantuar integritetin fizik dhe sigurinë e vetë stafit dhe qytetarëve. “Banka e Shqipërisë thekson se depozitat dhe kursimet e qytetarëve në sistemin bankar janë të sigurta. Dëmtimet e një pjese të infrastrukturës fizike në disa degë të bankave nuk cenojnë sigurinë e depozitave të klientëve dhe as qëndrueshmërinë financiare të bankave. Qytetarët duhet të jenë të qetë se kursimet e tyre janë të mbrojtura dhe nuk rrezikohen nga dëmtimet fizike të ambienteve”, thuhet në deklaratë. Sipas institucionit më të lartë monetar në vend, procesi i pagesave ka vijuar funksionimin e tij pa regjistruar probleme apo pengesa, duke shmangur kështu çdo ndikim negativ në rrjedhën e jetës ekonomike. “Banka e Shqipërisë siguron publikun se shërbimi i pagesave ka vijuar të funksionojë normalisht dhe pa ndërprerje, duke garantuar përmbushjen e rolit të sistemit bankar si domosdoshmëri e aktivitetit ekonomik të bizneseve dhe nevojave të konsumit të familjeve”, shtohet më tej në njoftim. Në përmbyllje të reagimit të saj, Banka e Shqipërisë u drejton një thirrje publike të gjithë qytetarëve që, gjatë shprehjes së vullnetit të lor përmes protestave paqësore, të tregojnë kujdes për ruajtjen dhe respektimin e sigurisë së vetë Bankës së Shqipërisë dhe të gjithë institucioneve të sistemit bankar.