Tensionet Shkup-Sofje: MPJ thirrje urgjente për diplomatin bullgar pas deklaratave provokuese

Ministria e Punëve të Jashtme dhe Tregtisë Jashtme ka thirrur sot në një takim zyrtar të Ngarkuarin me Punë të Ambasadës së Republikës së Bullgarisë në vend, në shenjë revolte ndaj deklaratave të fundit zyrtare nga Sofja. Sipas nomencaturës së diplomacisë vendase, shkak për këtë hap janë bërë komentet e ministrit të Punëve të Brendshme të Bullgarisë, Ivan Demerxhiev, rreth rastit të Iva Mihailovës, të cilat janë cilësuar si fyese dhe tejet provokuese. Po ashtu, pakënaqësi e thellë është shprehur edhe për paraqitjen e amabasadorit Zheljazko Radukov në televizionin bullgar "BTV", vlerësim ky i konsideruar si ndërhyrje e hapur në punët e brendshme dhe një gjykim i papranueshëm ndaj punës së institucioneve tona kompetente. "Ne theksuam posaçërisht se provokime të tilla e distancojnë dialogun dypalësh nga korniza në të cilën duhet të zhvillohen marrëdhëniet e fqinjësisë së mirë, të bazuara në respekt të ndërsjellë, përmbajtje dhe komunikim konstruktiv", thuhet në qëndrimin e institucionit tonë të diplomacisë. Lidhur me këtë situatë, nga MPJ u bë e ditur se sjellje të tilla rrezikojnë të detyrojnë shtetin të ndërmarrë një përgjigje institucionale, në përputhje të plotë me dispozitat e Konventës së Vjenës për Marrëdhëniet Diplomatike, e cila rregullon kufijtë e veprimit diplomatik dhe parimin bazë të mosndërhyrjes në çështjet e brendshme të shtetit pritës. Në përfundim të takimit, pala vendase ripërsëriti vullnetin për të kultivuar marrëdhënie fqinjësie të shëndetshme, të mbështetura te besimi i ndërsjellë dhe vlerat evropiane, duke kërkuar qartësi dhe përgjegjshmëri të njëjtë edhe nga autoritetet në Sofje. Kujtojmë se gjatë një intervistë të mëparshme, ministri Demerxhiev lëshoi deklarata ku autoritetet tona i etiketoi si "serbe", duke shtuar ndër të tjera: "Ne as nuk kërkojmë dhe as nuk do t'ua dorëzojmë autoriteteve serbe".