UEFA naivizon arbitrat hungarezë: Kush do të gjykojë sfidën San Marino - Shqipëri

Pasi nisi aventurën e re në Ligën e Kombeve me një fitore bindëse 2-0 kundër Bjellorusisë, Kombëtarja shqiptare ka kthyer tashmë sytë nga sfida e radhës në transfertë. Kuqezinjtë do të përballen me San Marinon të martën, më 29 shtator, me takimin që do të nisë në orën 20:45. Në prag të këtij dueli, shtëpia evropiane e futbollit, UEFA, ka bërë publike skuadrën e gjyqtarëve që do të ketë në dorë fatet e kësaj ndeshjeje. Drejtësia në fushë do t'i besohet një katërsheje arbitrash nga Hungaria. Mihaly Kapraly është caktuar si gjyqtar kryesor i sfidës, ndërsa rolin e anësorëve do e mbajnë Balazs Buzas dhe Peter Kobor. Për sa i përket zyrtarëve të tjerë, Marcell Derdak do të veprojë si gjyqtari i katërt, kurse në dhomën e VAR-it do të vendosë Tamas Bognar. Vlen të theksohet se 35-vjeçari Mihaly Kapraly nuk është një fytyrë e panjohur për kuqezinjtë. Ai ka drejtuar më parë një ndeshje të Kombëtares shqiptare, pikërisht atë miqësore të muajit qershor 2024, ku Shqipëria triumfoi me rezultatin 3-1 ndaj Azerbajxhanit.