Tragjedi në Jemen: Mbi 50 të vrarë dhe 200 të plagosur nga një sulm me raketa i rebelëve Huthi

Të paktën 53 persona kanë humbur jetën dhe mbi 200 të tjerë kanë marrë plagë të rënda si pasojë e një sulmi të fuqishëm të ndërmarrë të hënën nga rebelët Huthi në jug të Jemenit, i cili kishte në shënjestër një qendër trajnimi për sigurinë në provincën Shabwa. Sipas njoftimit zyrtar të bërë publik nga guvernatori i kësaj province përmes rrjeteve sociale, goditja ndodhi në momentin kur rekrutët e rinj të forcave të sigurisë së brendshme po zhvillonin sesionet e tyre stërvitore. Autoritetet vendase kanë reaguar ashpër ndaj këtij akti dhune, duke theksuar se përmasat e kësaj tragjedie kërkojnë ndërhyrje të menjëhershme në planin ushtarak dhe të sigurisë për të ndalur akte të ngjashme në të ardhmen. Në këtë linjë, u është bërë thirrje urgjente qeverisë jemenase dhe aleancës ushtarake të udhëhequr nga Arabia Saudite që të shtojnë kapacitetet mbrojtëse në rajon. Nga ana e tyre, përfaqësuesit e lëvizjes Huthi nuk kanë dhënë ende ndonjë koment zyrtar lidhur me ngjarjen dhe akuzat e ngritura. Ngjarja tragjike vjen në një periudhë kur tensionet dhe përleshjet armatosur janë intensifikuar ndjeshëm ndërmjet rebelëve Huthi dhe trupave besnike të qeverisë jemenase, e cila gëzon njohje ndërkombëtare dhe mbështetet nga koalicioni i udhëhequr ngaRiada. Kujtojmë se Jemeni vazhdon të përballet me një krizë të rëndë dhe konflikt të vazhdueshëm që prej vitit 2014, kohë kur rebelët Huthi morën kontrollin e kryeqytetit Sana dhe pjesës më të madhe të territoreve në veri të vendit.