Formë e shkëlqyer: Baton Zabërgja nuk ndalet, shënon në takimin e gjashtë rresht me fanellën e Kharkivit

Sulmuesi kosovar Baton Zabërgja po vazhdon të jetë lojtari kyç dhe vendimtar për skuadrën e tij ukrainase, Metalist Kharkiv, duke konfirmuar formën e lartë që po kalon. Futbollisti realizoi gol në minutën e 36-të të sfidës, duke zhbllokuar shifrat dhe kaluar skuadrën e tij në avantazh prej 1-0. Ky ishte goli i gjashtë për Zabërgjën në kampionat, ku krahas tyre ka regjistruar edhe një asistim, statistika këto që e pozicionojnë atë si golashënuesin e dytë më të mirë në Superligën e Ukrainës. Për 23-vjeçarin kjo shënon ndeshjen e gjashtë rresht ku gjen rrugën e rrjetës në të gjitha kompeticionet me fanellën e Kharkivit. Ai ka konfirmuar nuhatjen e tij prej golashënuesi duke realizuar në pesë ndeshje rresht në elitën e futbollit ukrainas dhe një herë tjetër në ndeshjet e kupës.