Kryeministri belg i dërgon urime Kurtit për detyrën e re, thekson rëndësinë e fuqizimit të partneritetit dypalësh

Kryeministri i Republikës së Kosovës, Albin Kurti, ka pranuar një mesazh urimi nga kreu i ekzekutivit të Mbretërisë së Belgjikës, Bart De Wever, me rastin e marrjes së mandatit të ri qeverisës. Në letrën e tij, kryeministri De Wever ka vënë në pah intensifikimin e dialogut politik mes dy shteteve ndër vite, duke përmendur takimin e tyre në Nju Jork në shtator të vitit të kaluar, si dhe vizitën e ministrit të tij të Punëve të Jashtme, z. Prévot, në kryeqytetin e Kosovës gjatë muajit prill të këtij viti. Sipas tij, këto vizita dhe komunikime dëshmojnë lidhjet e shkëlqyera që ekzistojnë mes Prishtinës dhe Brukselit. Duke e cilësuar si të suksesshëm bashkëpunimin e deritanishëm, kryeministri belg ka shprehur gatishmërinë e plotë për zgjerimin dhe intensifikimin e fushave të përbashkëta të veprimit, duke vënë theksin edhe te kontributi i rëndësishëm që jep diaspora në forcimin e këtyre urave lidhëse.