Mbështetja për bujqësinë: Gjatë kësaj jave nis shpërndarja e vendimeve dhe pagesave direkte për vitin 2026

Ministria e Bujqësisë, Pylltarisë dhe Zhvillimit Rural (MBPZhR), përmes Agjencisë për Zhvillimin e Bujqësisë (AZhB), ka njoftuar komunitetin e fermerëve se për skemën e Pagesave Direkte 2026 janë dorëzuar gjithsej 33,460 kërkesa. Procesi i verifikimit administrativ të dokumentacionit dhe inspektimet në terren për parcelat bujqësore kanë përfunduar me sukses. Brenda kësaj jave pritet të nisë zyrtarisht procesi i nxjerrjes së vendimeve dhe ekzekutimit të fondeve për sipërfaqet e tokës bujqësore, ndërkohë që do të publikohen edhe listat zyrtare me emrat e përfituesve. Pas këtij hapi, institucionet do të vijojnë me disburimin e mjeteve edhe për skemat e tjera mbështetëse. Ndërkaq, bujqit që janë marrë me kultivimin e grurit do të përfitojnë subvencione për sipërfaqet e mbjella, furnizimin me pleh artificial dhe mbulimin e shpenzimeve për derivate, konform kritereve dhe niveleve financiare të përcaktuara në vitet e kaluara.