Kamberi ashpër ndaj Beogradit: Udhëheqësit serbë ende ushqejnë iluzione për rikthimin e sovranitetit në Kosovë

Përfaqësuesi politik i shqiptarëve të Luginës së Preshevës, Shaip Kamberi, ka drejtuar kritika të ashpra në drejtim të establishmentit politik në Serbi, duke e akuzuar atë se jeton me shpresa të rreme për rivendosjen e pushtetit të saj mbi Kosovën. Gjatë një paraqitjeje televizive në emisionin “Info Magazine”, Kamberi vuri në dukje se udhëheqja serbe mbetet e ngujuar në mite mesjetare dhe ambicie kolonialiste, në vend që të fokusohet te ndërtimi i urave të bashkëpunimit dhe fqinjësisë së mirë me Kosovën dhe pakicën shqiptare në Luginë. “Ata vazhdojnë me ëndrrën e vet kolonialiste, me atë qe e kanë humbur Kosovën me një shpresë të imagjinuar për ta rikthyer kontrollin mbi Kosovën, dhe me politikën në të cilën mbizotërojnë mitet e mesjetës”, ka deklaruar Kamberi. Ai shtoi se skena politike në Serbi, përgjatë gjithë këtyre viteve, ka dështuar të dëshmojë një vizion largpamës dhe strategjik që do t'i hapte rrugë normalizimit të raporteve fqinjësore. “Pra asnjë klasë politike deri më tani në Serbi nuk ka arritur të ndërtojë një thellësi politike me të cilën do të mendojnë në mënyrë strategjike, që të relaksojë në radhë të parë raportet me Kosovën, të relaksojë raportet me shqiptarët në Luginë të Preshevës, të ndërtojë raporte më të mira”, është shprehur Kamberi. Në përmbyllje, ai ritheksoi se qasja zyrtare e Beogradit vazhdon të mbetet e penguar nga e kaluara, duke shfaqur paaftësi për të ndërmarrë hapa konkretë që i kontribuojnë paqes dhe stabilitetit afatgjatë në rajon.