Trazirat në Shqipëri, reagon ashpër Parlamenti Evropian: Dënohet dhuna, kërkohet hetim për policinë dhe dialog konstruktiv

Delegacioni i Parlamentit Evropian për marrëdhëniet me Shqipërinë, së bashku me raportuesin e përhershëm për vendin tonë, kanë shprehur shqetësimin e tyre të thellë në lidhje me zhvillimet dhe protestat e fundit në territorin shqiptar, veçanërisht në kryeqytet. Zyrtarët evropianë kanë dënuar në mënyrë të prerë përshkallëzimin e dhunës gjatë tubimeve, duke u ndalur te sulmet e drejtuara ndaj institucioneve dhe dëmtimet e regjistruara në pronën publike e private, teksa u kanë bërë thirrje qytetarëve që protestojnë të tregojnë vetëpërmbajtje maksimale dhe t'i japin fund akteve të dhunshme. Nga ana tjetër, delegacioni ka ngritur shqetësimin serioz mbi informacionet për përdorim të tepruar të forcës nga ana e efektivëve të policisë, duke kërkuar nga autoritetet kompetente që të nisin hetime të plota për çdo rast dhune me qëllim identifikimin dhe përcaktimin e përgjegjësive individuale. Duke sjellë në vëmendje se liria e shprehjes dhe e tubimit paqësor janë të drejta fundamentale të garantuara si nga Karta e BE-së për të Drejtat Themelore ashtu edhe nga Konventa Evropiane për të Drejtat e Njeriut, përfaqësuesit e BE-së theksuan se të rinjtë kanë plotësisht të drejtë të ngrenë shqetësimet e tyre për të ardhmen. Në përfundim të deklaratës së tyre, europarlamentarët bënë thirrje për një dialog të hapur, paqësor dhe konstruktiv mes të gjitha palëve, duke kujtuar se respektimi i plotë i shtetit të së drejtës përbën një kriter parësor dhe kusht të panegociueshëm për avancimin e Shqipërisë drejt anëtarësimit në Bashkimin Evropian.