Aksion i gjerë i policisë: Kontrolle në 66 lokale e kazino, kapen shkelës të ligjit dhe lojëra të paligjshme fatit

Ministria e Punëve të Brendshme ka bërë të ditur se gjatë fundjavës së 17 dhe 18 tetorit 2026, Departamenti i Policisë Kriminalistike, në bashkëpunim të ngushtë me sektorët rajonalë të punëve të brendshme dhe shërbimet e ndryshme inspektuese, ka ndërmarrë një aksion kontrolli në 66 objekte hotelierike dhe kazino, ku janë konstatuar shkelje të shumta ligjore. Gjatë këtij operacioni, efektivët e policisë kanë identifikuar 38 persona, kanë kontrolluar 61 qytetarë dhe një automjet pasagjerësh, si dhe kanë verifikuar identitetin e 31 personave të tjerë. Sipas njoftimit zyrtar, gjatë inspektimeve është kapur një person që kryente shërbime sigurimi pa poseduar licencë dhe pa kartë identifikimi, ndërsa në një tjetër ambient është regjistruar prishje e rendit dhe qetësisë publike. Po ashtu, janë shqiptuar tri gjoba për shkelje të Ligjit për Mbrojtjen nga Pirja e Duhanit. Autoritetet ndaluan një person pasi refuzoi të identifikohej, ndërsa tre shtetas të huaj u shoqëruan për shkak të qëndrimit të parregulluar në vend. Në njërin nga lokalet u gjetën katër të mitur pas mesnatës, ndërsa në dy objekte të ndryshme u konstatua se u ishte shërbyer alkool të miturve. Në një zhvillim tjetër, në rrugën pranë fshatit Mazhuçishtë të Prilepit, është ndaluar një shofer që drejtonte mjetin nën efektin e alkoolit, ku pas matjes rezultoi me 2,04 promilë në gjak. Ai është privuar nga liria nën dyshimin për veprën penale “Drejtim i pakujdesshëm i automjetit”, në bazë të nenit 297-a të Kodit Penal. Ndërkohë, Njësia e Punëve të Brendshme në Kërçovë ka kryer një bastisje në një lokacion ku zhvilloheshin lojëra fati në mënyrë të paligjshme. Aty janë kapur dy persona dhe janë sekuestruar prova materiale, ndërsa pas plotësimit të dokumentacionit do të ngritet kallëzimi përkatës. Në këtë aksion morën pjesë edhe Inspektorati Shtetëror i Tregut, Drejtoria e të Ardhurave Publike, Inspektorati Shtetëror i Punës, Drejtoria e Mbrojtjes dhe Shpëtimit, si dhe Agjencia e Ushqimit dhe Veterinarisë. Këto institucione konstatuan parregulikësi që përfshijnë punonjës të padeklaruar, ushtrim aktiviteti pa lejet përkatëse, moslëshim të faturave fiskale, biznese të paregjistruara, qarkullim devizash, si dhe mangësi në kushtet higjienike e mbrojtjen nga zjarri, për të cilat janë ndërmarrë masat ndëshkimore. Nga MPB theksojnë se kontrollet e intensifikuara dhe të bashkërenduara në ambientet hotelierike dhe kazino do të vijojnë edhe në të ardhmen, në bashkëpunim me institucionet kompetente, me qëllim parandalimin dhe ndëshkimin e paligjshmërive, zbatimin e rreptë të ligjeve dhe rritjen e sigurisë për të gjithë qytetarët.