A do të mund të sigurohen fanellat zyrtare të Kosovës? Agim Ademi zbulon detajet për pikat e shitjes

Tifozët e Kombëtares së Kosovës së shpejti do t'i kenë shumë më pranë fanellat zyrtare të Përfaqësueses. Kryetari i Federatës së Futbollit të Kosovës (FFK), Agim Ademi, ka njoftuar se institucioni që ai drejton është drejt finalizimit të një hapësire të posaçme për ekspozimin dhe shitjen e tyre brenda ambienteve të federatës. Gjatë një prononcimi për media, kreu i FFK-së ka shpjeguar se vonesa në hedhjen në treg të fanellave të reja ka ardhur si pasojë e kalimit te partneriteti i ri me markën prestigjioze "Adidas". Sipas tij, nuk është dashur të nxirreshin në shitje fanellat e vjetra gjatë periudhës së tranzicionit. Ai ka shtuar se bashkëpunimi me këtë brend global do të jetë afatgjatë dhe se blerja e fanellave origjinale do të bëhet përmes disa formave të ndryshme. “Meqë e kemi ndërruar, e kemi marrë Adidas-in, nuk kemi dashur ta qesim në shitje asnjë fanellë të re, sepse do t’i binte keq për njerëzit se po i shet këto që më nuk janë. Tashmë e dimë që Adidas - in do ta kemi për một kohë pak më të gjatë, sepse është brendi më i mirë në Evropë, mund të them edhe në botë, dhe krahas kësaj, do të ketë tani edhe vende ku mund ta blesh, edhe do ta kemi shou room-in në federatë, që pothuajse gati e kemi, edhe fizike edhe online, gjithsesi. Janë disa dyqane këtu që janë përfaqësues të Adidas - it, dhe ata e kanë ndresën e Kosovës, dyqanet të cilët janë përfaqësues të Adidasit, përfaqësues të rregullt, do të thotë po flas për origjinalin. Tani sigurisht që i gjen edhe nëpër treg, por unë i lus të gjithë ata të cilët merren me këtë punë dhe e mbrojnë brendin, që të kujdesen për këtë punë, që, ai i cili e blen, duhet ta blejë fanellën e shtetit të Kosovës, do të thotë atë zyrtare, origjinalin. Edhe pse, mund të them lirisht, që, pothuajse pas çdo ndeshje, secili futbollist, e jep fanellën, është arsye, pikërisht, për ata që nuk e kanë mundësinë ta blejnë një fanellë, sepse Adidas e ka edhe një çmim pak tjetër, pak më të shtrenjtë se të tjerët”, ka deklaruar Ademi. Në lidhje me aspektin financiar, Ademi ka pranuar se çmimet e fanellave të prodhuara nga "Adidas" mund të jenë më të larta krahasuar me prodhuesit e tjerë. Ai gjithashtu u ka bërë thirrje qytetarëve që të tregojnë kujdes dhe të sigurojnë vetëm produktet origjinale, duke shmangur kopjet që mund të qarkullojnë në tregun jozyrtar. Për më tepër, kryetari i FFK-së ka kujtuar se pas çdo ndeshjeje, lojtarët e Kosovës zakonisht i dhurojnë fanellat e tyre tifozërisë, si një mundësi alternative për ata që e kanë të pamundur blerjen e tyre.