Zgjidhje moderne për provimin e Jurisprudencës: Ministri Shasivari takon studentët për të diskutuar modelin e ri

Ministria e Drejtësisë do të jetë sot nikoqire e një takimi të rëndësishëm mes ministrit Jeton Shasivari, përfaqësuesve të studentëve dhe autoriteteve të fakulteteve juridike, ku pritet të zbulohet propozimi zyrtar për rregullimin e çështjes së provimit të Jurisprudencës. Në prag të këtij takimi, ministri Shasivari ka theksuar se konsultimi me studentët mbetet prioritet, ndërsa ka shprehur përkushtimin e tij maksimal dhe angazhimin e përditshëm për t'i dhënë fund kësaj sfide sa më parë. "Objektivi ynë është transparent dhe i drejtpërdrejtë. Synojmë një zgjidhje bashkëkohore dhe juridikisht të patëmetë, e cila reflekton nevojat e studentëve që studiojnë në gjuhë të ndryshme. Këtë çështje e trajtojmë në rrafshin ligjor dhe institucional, duke shmangur praktikat e mbyllura të vendimmarrjes", u shpreh Shasivari. Ai gjithashtu nënvizoi rëndësinë e përfshirjes aktive të studentëve në këtë proces: "Dëshirojmë një qasje ku vërejtjet e tyre të merren parasysh. Sot do të paraqesim modelin dhe bazën e tij, duke besuar te fuqia e argumenteve tona. Diskutimet me studentët dhe përfaqësuesit akademikë do të shërbejnë për të përcaktuar zgjidhjen përfundimtare, e cila më pas do t'i bëhet e ditur opinionit publik".