Seanca e re plenare caktohet për të enjten, Vlora Çitaku merr drejtimin e grupit për Strategjinë e Hagës

Kryesia e Kuvendit të Kosovës ka vendosur që të enjten, duke filluar nga ora 10:00, të mbajë seancën e radhës plenare. Në fokus të rendit të ditës do të jetë themelimi i Komisionit për përzgjedhjen e anëtarëve të rinj të Bordit të Radiotelevizionit të Kosovës (RTK). Kryetarja e Kuvendit, Albulena Haxhiu, pas përfundimit të mbledhjes së Kryesisë, njoftoi se nënkryetarja e legjislativit, Vlora Çitaku, i është besuar drejtimi i grupit punues i cili do të merret me hartimin e strategjisë shtetërore lidhur me Dhomat e Specializuara në Hagë. “Kuvendi i Kosovës duhet të japë kontribut maksimal. Do të ftohen edhe ekspertë të fushës që mund të japin kontributin e tyre. Vlerësoj se është rruga e duhur për përballjen e Kosovës në këtë proces të padrejtë”, deklaroi ndër të tjera Haxhiu.