Incident i rëndë në Britani: Qëllohet me armë efektivi i policisë, vihen në pranga katër persona

Katër persona kanë rënë në pranga nga autoritetet britanike, pasi një efektiv i forcave të rendit u plagos me armë zjarri gjatë një operacioni në qytetin e Nottinghamit. Sipas njoftimit zyrtar nga Policia e Nottinghamshire, ngjarja ka ndodhur në orët e para të mëngjesit të së dielës në zonën Angel Row, në momentin kur punonjësi i policisë iu afrua dy personave të dyshuar, të cilët papritur kanë hapur zjarr ndaj tij. Autoritetet policore bënë të ditur se oficeri i plagosur ndodhet nën kujdesin mjekësor në spital dhe gjendja e tij shëndetësore paraqitet e qëndrueshme. Reagimi i policisë ka qenë i menjëhershëm. Gjatë një kontrolli të automjeteve të ndërmarrë mbrëmjen e së dielës në zonën Redford të Nottinghamit, u ndaluan dhe u arrestuan dy gra të moshës 25 dhe 27 vjeç, si dhe një 24-vjeçar. Ndërkohë, operacioni vijoi edhe në orët e para të mëngjesit të së hënës, ku u bë i mundur arrestimi i një 30-vjeçari në Bedfordshire. Grupi hetues po punon intensivisht për të zbardhur plotësisht rrethanat e ngjarjes dhe për të hedhur dritë mbi motivet që çuan në këtë sulm të armatosur ndaj efektivit të policisë.