Protestat në Shqipëri, Rama porosi efektivëve: Vetëpërmbajtje ndaj të rinjve, ligji të godasë dhunuesit

Kryeministri Edi Rama ka rikthyer vëmendjen te tensionet dhe aktet e dhunës që kanë karakterizuar protestat gjatë javës së fundit në vend. Gjatë reagimit të tij, kreu i Qeverisë ka vlerësuar maksimalisht punën e strukturave të rendit, duke i cilësuar ata si shembull të profesionalizmit përballë agresivitetit të shfaqur në sheshe. “Respekt dhe po, jeni më të mirët në këto ditë agresioni me gurë e me zjarr mbi ëndrrën e Shqipërisë 2030 në Bashkimin Europian”, është shprehur kryeministri. Në mesazhin e tij drejtuar forcave të policisë, Rama ka kërkuar qasje të ndryshme në terren: maturi maksimale ndaj qytetarëve të rinj që marrin pjesë në tubime, por njëkohësisht reagim të rreptë dhe ligjor ndaj personave që përdorin gurë apo zjarr. “Durim dhe vetëpërmbajtje me të rinjtë që protestojnë. Forcë me gurëhedhësit dhe zjarrvënësit e maskuar”, ka përfunduar ai.