Operacioni “Blindi” në Laç: Lëviznin me makinë të blinduar, arrestohet 35-vjeçari që kishte thyer “Arrestin në shtëpi” dhe bashkëpunëtori i tij

Strukturat e policisë në Kurbin, në bashkëpunim me Forcën e Posaçme “Shqiponja” dhe sektorët e posaçëm hetimor, kanë kurorëzuar me sukses operacionin policor të koduar “Blindi”. Si rezultat i këtij aksioni, janë vënë në pranga dy banorë të qytetit të Laçit, konkretisht Elson Picaku, 35 vjeç, dhe Zef Kolndreu, 31 vjeç. Blutë e qytetit kanë ndërhyrë duke bërë të mundur kapjen në flagrancë të dy të dyshuarve, të cilët po qarkullonin në rrugët e Laçit me një automjet luksoz të blinduar të markës “BMW”, nën drejtimin e 35-vjeçarit Picaku. Gjatë verifikimeve të detajuara nga ana e efektivëve, u konstatua se ky i fundit kishte shkelur hapur masën e sigurimit personal “Arrest në shtëpi”, e cila ishte vendosur më parë ndaj tij nga Gjykata e Apelit të Tiranës për veprën penale të prodhimit dhe shitjes së lëndëve narkotike. Në të njëjtën kohë, gjatë kontrollit fizik të ushtruar ndaj pasagjerit Zef Kolndreu, shërbimet e rendit zbuluan dhe sekuestruan një sasi substance të dyshuar narkotike Cannabis Sativa. Ndërkohë, gjatë kontrollit të mëvonshëm të ushtruar në banesën e tij, autoritetet policore gjetën dhe sekuestruan gjithashtu një jelek antiplumb dhe një armë të ftohtë (shpatë). Në cilësinë e provës materiale, përveç lëndës narkotike, jelekut antiplumb, armës së ftohtë dhe tre aparateve celulare, policia ka sekuestruar edhe makinën e blinduar, e cila dyshohet se është blerë me të ardhura që rrjedhin nga aktivitete të paligjshme. Ndërkohë, grupi hetimor po vijon punën intensive për dokumentimin e plotë të veprimtarisë kriminale të të arrestuarve, ndërsa materialet procedurale i kanë kaluar Prokurorisë për veprime të mëtejshme.