Mbyllet xhiroja e dhjetë e Superligës: Ballkani pret Prishtinën në derbin e ditës, sfidë e nxehtë edhe në Klinë

Rrethi i dhjetë i elitës së futbollit kosovar ulet sot siparin me dy përballje mjaft interesante. Vëmendja kryesore e adhuruesve të sportit do të jetë e përqendruar në Suharekë, aty ku zhvillohet derbi i madh i ditës, gjersa një tjetër sfidë me mjaft peshë do të luhet edhe në qytetin e Klinës. Me fillim nga ora 14:00, Ballkani do të jetë nikoqir i Prishtinës. Bardhekaltrit nga kryeqyteti zbresin në fushtë nga pozita e dytë në tabelë me 20 pikë të grumbulluara nga tetë takime të zhvilluara. Një sukses eventual sot do t'u mundësonte atyre që të kapin kuotën e 23 pikëve dhe të barazohen me liderin e tabelës, Malishevën, e cila i ka zhvilluar dhjetë ndeshje. Në krahun tjetër, skuadra suharekase renditet në vendin e gjashtë me 13 pikë dhe kërkon me çdo kusht rikthimin te rezultatet pozitive, pas dështimit 1:0 përballë Dritës në xhiron e kaluar. Ekipit vendas i nevojiten pikët e plota për të mos lejuar thellimin e distancës me skuadrat e kreut. Sakaq, Prishtina hyn në këtë përballje pas barazimit 1:1 me Malishevën, ndërsa në tri duelet e fundit kampionale ka bilanc prej një fitoreje dhe dy barazimesh, duke synuar të mbajë të paprekur ecurinë pa humbje. Më vonë, në orën 18:00, vëmendja do të zhvendoset në Klinë, ku Dukagjini do të përballet me Drenicën. Vendasit synojnë të shfrytëzojnë përparësinë e fushës së tyre për të vazhduar momentumin pozitiv. Aktualisht, klinasit ndodhen në pozitën e pestë me 16 pikë, pas një fitoreje minimale 1:0 ndaj Vushtrrisë, duke dëshmuar qëndrueshmëri të lartë, veçanërisht në repartin defensiv. Nga ana tjetër, Drenica zë vendin e shtatë me 10 pikë dhe udhëton drejt Klinës për të reaguar pas disfatës 3:0 të pësuar nga Gjilani. Ekipi nga Skenderaj synon të nxjerrë pikë në këtë transfertë për të mbetur në hap me skuadrat që e paraprijnë në renditje. Fitorja do t'i shërbente shumë secilës skuadër për përmbushjen e objektivave të tyre në këtë edicion garues.