Incident i dyshimtë me eksplozivë pranë bazës ajrore amerikane në Britani, evakuohet zona dhe arrestohen disa persona

Një situatë alarmi është regjistruar pranë një baze ajrore amerikane në Mbretërinë e Bashkuar, ku autoritetet kanë ndërhyrë duke arrestuar disa persona dhe duke evakuuar banorët vendas pas dyshimeve për praninë e lëndëve shpërthyese. Ngjarja ka ndodhur në afërsi të bazës RAF Fairford, në Gloucestershire, ndërkohë që policia lokale ka shpallur zyrtarisht një incident madhor në zonën e Whelford. Disa individë janë vënë në pranga nën dyshimin e shkeljes së legjislacionit për eksplozivët. Në terren janë angazhuar menjëherë ekipet e specializuara ushtarake për menaxhimin dhe asgjësimin e municioneve. Forcat e rendit po kryejnë kontrolle të imtësishme në disa automjete, ndërsa popullsia vendase është zhvendosur përkohësisht në një qendër të sigurisë së posaçme për të shmangur çdo rrezik të mundshëm. Ky incident regjistrohet në një periudhë kur masat e sigurisë rreth bazës amerikane janë ngritur në nivele të larta, të shoqëruara nga bllokime aksesesh rrugore, kontrolle të rrepta dhe prani të shtuar të efektivëve të armatosur të policisë.