“Skandal me çmimet!” Erion Braçe shpërthen ndaj abuzimeve në treg dhe zhvlerësimit të monedhave të huaja

Deputeti i Partisë Socialiste, Erion Braçe, ka ngritur alarmin përmes një denoncimi publik në rrjetet sociale lidhur me shtrenjtësinë e artikujve ushqimorë, në një periudhë kur monedhat e huaja, euro dhe dollari, kanë pësuar rënie të ndjeshme në tregun e këmbimit, ndërsa valuta vendase, leku, ka shënuar forcim të ndjeshëm. Sipas ligjvënësit socialist, ky disbalancim jo vetëm që nuk po pasqyrohet në lirimin e çmimeve për frutat, perimet dhe ushqimet e shportës, të cilat mbeten në nivele të papërballueshme, por dëshmon hapur një praktikë abuzive, mungesë mbështetjeje institucionale, si dhe një sektor ushqimor vendor që sipas tij mbetet pothuajse inekzistent. Lidhur me parregullsitë në kursin e këmbimit, Braçe thekson se supermarketet, pikat e pakicës dhe rrjetet e tregtimit të karburanteve nuk gëzojnë asnjë të drejtë apo legjitimitet për të kryer këmbim valutor, pasi detyrimi i tyre ligjor është që të gjitha transaksionet tregtare t'i kryejnë ekskluzivisht në lekë. “Ajo që të lë pa mend është fakti që ndërkohë që leku forcohet, euro e dollari bie, në këto dyqane edhe më shumë se tregu, çmimet e produkteve të importit jo vetëm janë të larta, por janë të qëndrueshme të larta”, shprehet ai në mesazhin e tij, të shoqëruar me një material videografik.