Tradita dhe eksporti bashkohen në Deçan: Ferma vendase shpalos prodhimet bio në panairin e sivjetmë

Komuna e Deçanit është bërë sërish dëshmitare e kremtimit të trashëgimisë bujqësore përmes manifestimit tradicional “Dita e Gështenjës”, ku prodhuesit vendas kanë shfrytëzuar hapësirën e Panairit të Prodhimeve Bujqësore për të ekspozuar gështenjën dhe specialitetet e tjera autoktone të zonës. Duke evokuar kujtimet e së kaluarës dhe rëndësinë historike të këtij fruti, fermeri Besim Zeka ka shprehur mirënjohjen e tij për këtë ngjarje: “Dita e Gështenjës, kuptohet që te ne në Dukagjin gështenja është e përmendur, sepse familjet dikur e kanë siguruar bukën e motmotit me frutin që e kanë marrë prej gështenjave që i kanë mbledhur. Për të gjithë është ditë e mirë dhe jemi shumë të kënaqur”. Nga ana e tij, bletari Meta Gjikokaj ka vënë në pah pasuritë natyrore të rajonit dhe përkushtimin e komunitetit bujqësor: “Fatmirësisht, në Deçan e kemi një natyrë pothuajse të virgjër dhe po mundohemi ta shfrytëzojmë këtë në mënyrë që të ofrojmë produkte sa më cilësore, siç është gështenja, që sot e kemi Ditën e Gështenjës. Po kemi edhe fermerë të zotë që ofrojnë produkte organike, bio. Është kënaqësi kur konsumatorëve u ofron një produkt cilësor. Shpresoj që të na bashkohen edhe bletarë të tjerë”. Përveç gështenjave, vëmendja e vizitorëve është fokusuar te një risi e veçantë e këtij edicioni, përkatësisht prezantimi i dy varieteteve të kungujve të cilët gëzojnë certifikim ndërkombëtar dhe tashmë janë pjesë e tregjeve evropiane. Lidhur me këtë sukses, Bajram Çeku nga grupi lokal i veprimit GLV “Gjeravica” në Deçan ka saktësuar: “Konkretisht, këtu kemi dy lloje të kungujve që eksportohen në Zvicër tash e gjashtë vjet dhe kjo është duke e rritur vlerën e prodhimeve bujqësore, aq më shumë që këto prodhime janë të certifikuara nga BioInspekta dhe shkojnë me një vlerë më të madhe në Zvicër”. Kastriot Himaj, drejtor i Drejtorisë për Bujqësi, Pylltari dhe Zhvillim Rural (DBZHR) në Deçan, ka treguar mbi konceptin organizativ të kësaj ngjarjeje: “Sa u përket fermerëve dhe prodhimeve bujqësore, ne jemi përkujdesur që në panair të marrin pjesë vetëm fermerët e komunës sonë. Jemi munduar t’i përfshijmë të gjitha prodhimet dhe besoj që ka qenë ndër panairet më të mira. Këtë vit i kemi përfshirë edhe shoqatat alpiniste, të cilat do të ecin në Shtegun e Gështenjës”. Statistikat zyrtare dëshmojnë se rajoni i Dukagjinit, me në krye Deçanin si dhe komunat përreth si Gjakova, Peja dhe Juniku, shtrijnë rreth 3.500 hektarë të mbjella apo të pasura me drurë gështenje, duke dëshmuar potencialin e jashtëzakonshëm ekonomik dhe ekologjik të kësaj zone.