Alarmi i onkologut: Rreth 1 mijë raste të reja në vit, zbulimi i hershëm garanton shërim nga kanceri i gjirit

Në kuadër të muajit të ndërgjegjësimit kundër kancerit të gjirit, i njohur si muaji rozë, mjeku onkolog Ilir Ismaili ka përcjellë një mesazh të fuqishëm sensibilizues, duke kujtuar se pas çdo diagnoze të karcinomit fshihet një nënë, një grua dhe mbi të gjitha një jetë njerëzore. Duke vënë theksin te rëndësia e parandalimit, specialisti u bën thirrje të gjitha grave që t'i nënshtrohen rregullisht vetëkontrollit, ekografisë dhe mamografisë, pasi identifikimi në fazat e para ofron shërim të plotë për pacienteshat. Sipas dr. Ismailit, shkaqet e kësaj sëmundjeje ndahen në dy grupe kryesore – faktorë të brendshëm dhe të jashtëm. Ndër faktorët e brendshëm përfshihen ndikimet endokrine, cikli i hershëm menstrual, menopauza e vonshme, lindja në moshë më të shtyrë, mospërshkimi me gji, përdorimi i preparateve hormonale dhe mënyra e jetesës. Ndërkohë, faktorët e jashtëm lidhen me konsumimin e alkoolit, duhanit, mungesën e aktivitetit fizik dhe praninë e stresit të lartë, të cilët së bashku favorizojnë shfaqjen e karcinomit. Një mesazh shprese për të gjitha gratë e prekur ka dhënë edhe kirurgu turk, Omer Bender, gjatë qëndrimit të tij në Shkup për fushatën e muajit rozë. “Kanceri i gjirit është plotësisht i shërueshëm dhe çelësi kryesor mbetet zbulimi i hershëm. Gratë nuk duhet të frikësohen nga kontrollet mjekësore. Edhe në rastet kur humbet gjiri, sot ekzistojnë teknika të reja estetike rindërtuese që nuk lënë asnjë shenjë dalluese”, u shpreh kirurgu Bender. Nga ana tjetër, onkologu Ismaili thekson se vendi ynë disponon kapacitete dhe procedura moderne diagnostikuese, duke u siguruar qytetarëve qasje të lehtë në to. Ai shtoi se Ministria e Shëndetësisë zbaton një program specifik dhe regjistër të posaçëm për karcinomin, falë të cilit dihet saktësisht numri i pacientëve të diagnostikuar, një praktikë kjo që sipas tij mungon në disa nga shtetet e rajonit.