Sulmohet infermierja në Prishtinë gjatë kryerjes së detyrës, reagon ashpër Drejtoria e Shëndetësisë

Një infermiere e Qendrës Kryesore të Mjekësisë Familjare (QKMF) në kryeqytet është bërë cak i një sulmi fizik teksa ishte në orar të punës, duke ofruar ndihmë mjekësore brenda në shtëpinë e një pacienti në lagjen Kalabria. Lidhur me këtë ngjarje ka reaguar drejtori i Drejtorisë së Shëndetësisë në Prishtinë, Bujar Gashi, i cili ka shprehur indinjatën e tij dhe ka dënuar ashpër dhunën e ushtruar ndaj punonjëses së shëndetësisë. “Sulmi ndaj profesionistëve që janë në detyrë për të ndihmuar dhe për t’u kujdesur për qytetarët është i papranueshëm dhe nuk do të tolerohet në asnjë rrethanë. Siguria dhe dinjiteti i tyre janë të panegociueshme”, është shprehur Gashi në reagimin e tij. Ai gjithashtu ka bërë të ditur se ngjarja është denoncuar menjëherë në organet e rendit dhe tashmë po trajtohet nga Policia e Kosovës dhe institucionet e tjera kompetente. Pavarësisht këtij incidenti shqetësues, kreu i Shëndetësisë në Prishtinë ka garantuar se kujdesi mjekësor në terren do të vijojë pa u ndalur. “Bëhet fjalë për një rast të izoluar, i cili nuk do të ndikojë në ofrimin e kujdesit shëndetësor. Shërbimet në terren do të vazhdojnë normalisht, pa ndërprerje dhe me të njëjtin përkushtim ndaj çdo qytetari që ka nevojë për kujdes”, ka theksuar ai në deklaratën e tij.