Protestat në Tiranë: Gjykata liron nga qelia 31 të arrestuarit, vendos masa alternative për të rriturit dhe të miturit

Gjykata e Shkallës së Parë e Juridiksionit të Përgjithshëm në Tiranë ka përfunduar këtë të diel seancën për vlerësimin e masave të sigurisë ndaj 31 personave të ndaluar gjatë trazirave të fundit në protestat e kryeqytetit. Seanca u zhvillua nën praninë e organit të akuzës, të pandehurve dhe avokatëve mbrojtës, ndërsa për shkak të pranisë së të miturve në sallë ishin të pranishëm edhe përfaqësues të Avokatit të Popullit dhe psikologë. Trupi gjykues vendosi që të gjithë të ndaluarit të lirohen menjëherë nga qelia, duke shmangur çdo masë me karakter burgosës. Konkretisht, për pjesën dërrmuese të të rriturve, të cilët akuzohen për vepra penale si “kundërshtimi i punonjësit të policisë”, “shkatërrimi i pronës” dhe “vjedhja”, u caktua masa e sigurisë “detyrim për t’u paraqitur në policinë gjyqësore”. Ndërkohë, për dy prej të hetuarve, shtetasit I. D. dhe A. L., përveç detyrimit të paraqitjes, u vendos edhe masa e “ndalimit dhe detyrimit të qëndrimit në një vend të caktuar”. Për më tepër, atyre iu ndalua rreptësisht t’i afrohen institucioneve publike në një distancë më të afërt se 100 metra, si dhe të marrin pjesë në çdo tubim apo protestë të paautorizuar. Nga ana tjetër, për 9 të miturit e përfshirë në konflikt me ligjin – të cilët dyshohen për vepra të tilla si “shkelje e rregullave mbi lëndët plasëse” apo “mbajtje pa leje e armëve të ftohta” – gjykata vendosi masën e “vendosjes së të miturit në mbikëqyrje”, në përputhje me dispozitat e Kodit të Drejtësisë Penale për të Mitur. Përgjegjësia për mbikëqyrjen iu la prindërve ose të afërmve, të cilët u ngarkuan me detyrimin për të garantuar paraqitjen e fëmijëve para drejtësisë dhe respektimin e rendit ligjor. Gjatë seancës, gjykata lëshoi gjithashtu një paralajmërim të qartë për prindërit dhe kujdestarët ligjorë, duke theksuar se çdo shkelje apo dështim në ushtrimin e kontrollit ndaj të miturve do të shoqërohet me gjobë që shkon deri në 20,000 lekë. Palët e pakënaqura kanë afat prej 5 ditësh për të ushtruar të drejtën e ankimit kundër këtij vendimi në Gjykatën e Apelit të Juridiksionit të Përgjithshëm.